Yewîya Tabîbê Tirkî (TTB) seba tewrbîyayîşê mîtîngo ke do 29ê gulane de Anqara de pê bêro, eşkerayî daye. Rayîrberê TTByî tewrê eşkerayî bîyî. Eşkerayîya ke ame dayîş de Endamê Heyetê Konseyê Rayîrber yê TTByî Kazim Dogan Erogullarî qisey kerd û da zanayene ke probleme weşîye her ke şono Tirkîya de zêde beno.
Kazim Erogullari qiseykerdişê xo de bale ante probleme sîstemê weşîye û wina vat: “Ê ke vatî; êdî dorê verê bere nêweşxaneyan qedîya, bi rayîrê sîstemê randevu girewtişî nêeşkenê 3 aşme dima randevu bigêrî û dorê telefonî de vindenî. Yê ke ganî ameliyat bibî, yê ke paweyê muayenebîyayîşî yî û yê ke keyeyanê xo de mecburê xizmetê weşîye yî, wijdanê nêweşxaneyanê taybetan rê vera dîyayî. Yê ke seba sîstemê weşîye vatêne; ma şoreş pê ardî, seba muayenebîyayîşî 5 deqe rewa vînenê. No nizîbîyayîş weşî keno xizmetê sermayedaran û zirar dano komele û beno ke nêweşî bizêdî.”
Erogullari tewr peynî wina vat: “Çalakîyê ma ke ma seba heqê xo, heqê keda xo û heqê komelî dayî destpêkerdiş, hetê îqtîdarî ra cîdî nînê girewtiş. Ma yenê meşgulkerdiş. Ma zanê eke ma bi qerardarî têkoşînê xo bidomnî, ma do biresî heqê xo. Bêrêne ma pîya vajî bes o û no sîstem bibedelnî. Bêrêne ma mîtîngê ‘Ked û vatiş yê ma yo, weşîye ya ma ya’ de kom bibî.”
Sereka Pêroyî ya Konseyê Merkezî ya TTByî Şebnem Korur Fîncanciye zî wina vat: “Ma hemwelatîyan dawetê rayraşîyayîşê xo yê verbendikî kenî. Wexto ke ma vera şîdeto ke bi ma yeno kerdiş de pê nêkerî do qanûn mird nêkerî. Rayraşîyayîş û têkoşînê ma yê doktoran nêreso heqê xo do dewam bikero.” ANQARA
