AMED |
Komeleya Piştevaniya Malbatên Girtiyan (TUAY-DER) a Amedê, ji bo balê bikişîne ser zextên li ser girtîgehan, li avahiya komeleya xwe daxuyanî da çapemeniyê. Rêveberê TUAY-DER’ê Mehmet Uzel, daxuyanî da û diyar kir ku ji ber zextên li ser girtiyan zêde bûye, serlêdanên li komeleyê jî zêde bûne.
Uzel anî ziman ku wan di meha hezîranê de Girtîgeha Tîpa E ya Mêrdînê ziyaret kir û wiha got: “Me bi rêveberiya girtîgehê û girtiyan re hevdîtin kir. Me di vê ziyaretê de tespît kir ku binpêkirina mafan zêde bûye. Li gorî vê yekê;
- Di pêvajoya şewba vîrûsê de Li Girtîgeha Tîpa E ya Mêrdînê di hevdîtina girtî ya bi parêzeran de axaftina wan hat guhdarkirin. Guhdariya telefonê mafê dizî yê hevdîtinê binpê kiriye.
- Mesafeya fîzikî li ber çavan nehatiye girtin. Di ser kapasîteyê de girtî hene. Ev bandorek neyînî li ser tenduristiyê dike. Girtî li erdê radizên.
- Lêgerîn di asta tacîzê de tên kirin. Di lêgerînê de tedbîrên li dijî pandemiyê nayên girtin.
- Pirtûk, rojname û kovarên girtiyan bi sînor kirine. Ligel der barê pirtûk û kovaran de biryara komkirinê tune jî bi keyfî kom dikin.
- Rojê 3 caran û her carê 45 dakikayan avê didin girtiyan. Ji ber tunebûna avê girtî nikarin paqijiyê bikin. Ava germ nadin girtiyan.
- Malzemeyên paqijiyê têr nadin girtiyan.
- Gardiyanan di pêvajoya şewbê de dîsa girtî jimartine.
- Daxwaza girtiyên nexweş a nexweşxaneyê bi şertê 15 rojan tecrîdê hatiye qebûlkirin û ji ber vê yekê girtî nikarin biçin nexweşxaneyê.
- Gelek girtî bi awayeki keyfî rastî cezayê dîsîplînê tên. Hin girtî heta 6 mehan rastî cezayê hucreyê tên û ji mafê xwe yê ziyaretan mahrûm dimînin.
- Mafê girtiyan ê tenduristiyê tê îhlalkirin.”
Uzel anî ziman ku ji ber şertên giran û binpêkirina mafan girtî li dijî van pêkanînan dest bi greva birçîbûnê kirine.
Her wiha Uzel bang li Wezareta Dadê, Komîsyona Mafên Mirovan a Meclisê, kir û xwest li gorî zagon û hiqûqê tev bigerin û wiha bidawî kir: “Em ê her tim bibin dengê girtiyên Girtîgeha Tîpa E ya Mêrdînê.”
