Hetkara Hemserekanê Partîya Demokratîke ya Şaran (HDP) û Parlementera HDPyî ya Adana Tulay Hatîmogullari derheqê xîretê hêrişê vera ci de Merkezê Pêroyî yê HDPyî de kombîyayîşê çapemenîye kerd. Hetkarê bînî yê Hemserekanê HDPyî, parlementerî, Heyetê Rayberdişê Merkezî û Endamê Meclîsê Cinîyan tewrê kombîyayîşî bîyî.
Tulay Hatîmogullari wina qala serebûtî kerde: “Îneyê verî di kesê bi çeke ameyî verê berê mi û înan ver cina. Mi înan rê ber anêkerd. La di kesan vat ‘Ma polîsê sivîlî yê’ û zor da berî ke abibo. Mi vat ez parlementer a û do xebere bida asayîşî. La înan israrê xo rê dewam kerd. Ez gêraya embazanê xo yê partîye, ma xebere daye asayîşî. O çax ê verê berî ra şîyî û ver bi Esat Dortyolî şîyî.”
Tulay Hatîmogullari da zanayene ke înan asayîş, dozgerîye û Meclîsî rê muracat kerd la dozgerîye waştişnameyê gerreyî nêgirewto.
Parlementera HDPyî Tulay Hatîmogullari vat: ”Avûkatê mi 7-8 dozgeran ra gêreno, peynî de pê zorî waştişname dano dzogerêkî. 2 kesanê çekdaran zor da berê mi la asayîşî hema zî derheqê babete de eşkerayîyêke nêdaye. Eke pê nê kerdişî yeno waştene HDP bigêro binê teda armancê înan do ser nêkewo. Eke parlementerêke maruza nê kerdişî bena merdimê sivîlî maruzê hêrişanê hîna xiraban benê. Nê tedayî do nêeşkê ma bitersnê.” ANQARA
