Sîyasetmedar Ahmet Faruk Unsalî dîyar kerd ke AKP faturaya weçînayîşê Stenbolî kurdan rê birneno û va: “Beno ke qayûm tayînê partîyanê bînan zî bêro kerdene û beno ke dore de Mansur Yavaş bibo. Eke Îmamoglu şêro Amed do şîyayîşê ci şîyayîşêko ca de bo.”
Her çiqas ke weçînayîşê herêmî yê 31ê adare de îradeya şarî ser bikewo zî AKP tehemmulê îradeya şarî nêkeno û qayûm tayînê Şaredarîyanê Girdan yê sey Amed, Wan û Mêrdînî kerd. Nê najaran de 3 rojî yo ke xoverdayîşê şarî dewam keno û xeylê cayan de reaksîyonî yenî ramotene. Sîyasetmedar û parlementerê verên yê AKPyî Ahmet Faruk Unsal qala tayînkerdişê qayûman kerd. Sîyasetmedar Ahmet Faruk Unsalî dîyar kerd ke AKP faturaya weçînayîşê Stenbolî kurdan rê birneno û beno ke qayûm tayînê partîyanê bînan zî bêro kerdene.
Unsalî qiseykerdişê xo de va ‘sebebê îqtîdarî ke şono HDPyî ser ra yew zî weçînayîşê Stenbolî yo’ û wina dewam kerd: “Xora pratîkê dewlete ke şono HDPyî ser ra estbî. Labelê sebebê tewr muhîm yê peynî weçînayîşê Stenbolî yo. Vindîkerdişê Stenbolî seba AKPyî darbeyêko gird bî û paweyêçîyêko winasî nêbî. AKP faturaya têkşîyayîşî HDPyî rêbirneno. Beno ke qayûm tayînê partîyanê bînan zî bêro kerdene û beno ke dore de Mansur Yavaş bibo. Eke Îmamoglu şêro Amed do şîyayîşê ci şîyayîşêko ca de bo. Şaredarîyê CHPyî rîskek gird reyde rî bi yî. Derheqê Mansur Yavaşîde prosesêko huqûqî esto. Eke proses peynî bibo mi gore dore de Şaredarîya Anqara esta. Şaredarê Şaredarîya Bajarê Girdî ya Stenbolî Ekrem Îmamoglu şêro Amed, Wan û Mêrdînî do zaf baş bibo. Ekrem Îmamoglu weçînayîşê 23ê hezîrane ra ver şîbî Rojhelatê Behro Sîya. Tura xo ya Behra Sîya temam kerd. Labelê eke şêro bajaranê kurdan do zaf baş bibo.”
Unsalî tewr peynî bale ant mesajê Rayberê PKKyî Abdullah Ocalanî ke vatbî ‘ez seba çareserkerdişê problemê kurd hadre ya’ û va: “Ganî vengo ke Ocalan berz keno esas bêro girewtene û ganî dewlete bi dişmenî nizdîyê sîstemê Vakurê Rojhelatê Sûrîye nêba.” ANQARA
