Serdozgerîya Komare ya Amedî binê nameyê ”PKK/KCK” de tehqîqato ke DBP keno hedef da destpêkerdene. Na çarçewe de Hakîmîya Cezaya Sulhe bire daye ke pêro bînayanê rêxistinanê şaristanî yê DBPyî de cigêrayîş bêro kerdene.
Sere de Amed de 9 şaristananê Vakurê Kurdistanî de polîsan eşt bîna û keyeyan ser. Çarçewa tehqîqatî de derheqê 15 kesan de bira destbendkerdişî dîyaye. Heta nika Hemsereko Pêroyî yê DBPyî Keskîn Bayindir zî tede 14 kesî ameyî destbendkerdene.
Nameyê tay destbendkerdeyan wina yê: “Hemserekê DBPyî Keskîn Bayindir, Hemserekê DBPyî yê Amedî Hayrettîn Altun û Seval Gulmez, Hemserekê Şirnexî Zekî Îrmez, Hemserekê Wanî Şengul Polat û Harun Okay, Hemserekê Riha Hîdayet Enmek, Hemserekê Dîlokî Erhem Onal û Zelîha Aslan, Hemserekê Mêrdînî Şerafettîn Aslan.”
Agirî û Êlih de bînayanê partîye de cigêrayîşî dewam kenê. Dîya zanayene ke derheqê hemserekanê Êlih û Agirî de zî bira destbendkerdişî est a. Wina pawîyeno ke destbendkerdeyî ewro do bêrê ardene bi Amedî. AMED
