Erazîyêkê Pulurî yo ke bi serran bêwayîr o, hetê dewijanê bêerdan ra ameyêne ramitene û sey warê mera ameyêne xebitnayene. Yeno plankerdene ke no erazî pê rayîrê kîrakerdişî do bêro dayene şîrketanê pîlan. Heyetê Pawitişê Munzurî vera babete pê eşkerayîyêke nêrazîbîyayîşê xo mojna.
Eşkerayîya Heyetî de ame vatene ke bêdestûrê şarê Dêrsimî, rêxistinanê komelê sivîlî û îdareyanê herêmîyan bira kîrakerdişî ameye dayene û ê vera kîrakerdişê erazî yê. Heyetî ard ziwan ke pê nê projeyî yeno armanckerdene ke kooperatîf, tewirê komelkî bêrê çinkerdene. Heyetî da zanayene ke şîrketê pîlî vera xebata kolektîfe ya şarî pê endustrîyalîzm erdê Dêrsimî pê silê kîmyewîyî û pestîtîstan bijeh bikerê.
Eşkerayîya Heyetê Pawitişê Munzurî wina dewam kena: ”Ma do destûr nêda ke erdê ma yo pak destê ma ra bêro girewtene. Ma do nêverdê ke erdê ma de serdestîya ma bêra girewtene. Ma sey Heyetê Pawitişî yê Dêrsimî wazenê ke no erazî kooperatîfan û şarê herême rê bêro dayene. Ma ê şîrketan rê zî vanê ke ma do nêverdê ke şima erdê ma de qet yew faalîyetê xo bikerê.” DÊRSIM
