Merkezê Xeberan
Aktîvîsta TJK-E Besime Konca derheqê Kampanyaya ‘100 Sebebê Seba Muhakemekerdişê Dîktatorî’ de qisey kerde. Konca da zanayene ke xeylêk kesanê namdaran û dezgehanê mîyanneteweyîyan 15 welatan ra tewr tay 50 rêxistinanê cinîyan paştî daye kampanya. Konca vat: ”Kampanyaya ma 8ê Adare ra dima vejîyaye werte. Rejîmo faşîst ê AKP-MHPyî bi hawayêkê giranî hêrişê cinîyan kenê. Cinîyê kurdî rayberîya têkoşînê azadîye yê cinîyan kenê û verê polîtîkaya qirkerdişî gênê. Ma pê na kampanya nêrazîbîyayîşê xo vera qirkerdişê cinîyan anê ziwan.”
Konca pare kerd ke cinîyanê kurdan pê şîarê ‘Vera qirkerdişê cinîyan ma cuya azade û komelê azadî bipawê’ dest pê têkoşînê 2021î kerd. TJK-E verî zî kampanyayê winasênî kerdbi û sey ewro tim armanc kerd ke verê şîdetê serê cinîyan bigêra, têkoşînê cinîyan xurtêr bikera. Ma çarçewa kampanyayanê xo de çalakî, aktîvîye, panel, konferans ûsn kenê.”
Konca bale ante Kampanyaya ‘100 Sebebê Seba Muhakemekerdişê Dîktatorî’ ser û vat: ”Erdogan û Bahçelî vera cinîyan ê kurdan sûcanê merdimîye kenê. Huqûqê Tirkîya zî nê sûcan bêceza verdeno û mîyan keno. Kampanya do Erdogan û Bahçelî teşhîr bikerê û muhakeme bikerê. Ma bi na kampanya mesûldarîya Neteweyan ê Yewbîyayeyan, Dîwanê Edaletî yê Mîyanneteweyî yê Laheyî, Konseya Ewropa, Yewîya Ewropa bîyarê înan vîrî ke vera s3ucanê dewleta tirke bêveng ê.”
Konca eşkera kerd ke heta nika înan 96 hezar îmzayî arê dayî la nê îmzayî qîm nêkenê. Konca vat: ”Ma seba arêdayîşê îmzayan standan akenê, înternetî ser o xîret kenê. Arêdayîşê nê îmzayan girîng o. ”
