Aksuyî ard ziwan ke seserra Tirkîya vurîyaya rejîmêko îstîsna û vat: ”Serdestî goreyê Qanûnê Bingeyîyî tênêgêrenê. Cigêrayîşê edaletî, grev, çalakî yenê astengkerdene. Tirkîya û Kurdîstan de şîrketî seba ke koy, daristan, çem, waranê zîretî tarûmar bikerê seferber bîyê. Bi taybetî Kurdîstan de huqûqê kolonyalîzmî est o. Kurdîstan de hem kurdî yenê înkarkerdene hem zî sermaye polîtîkayanê xo ya ekonomî ana ca. Kurdan rê koçberîye û xizanîye yenê ferzkerdene.

Bi GAP û awbendan binê nameyê ‘sermaye’ û ‘awbendanê asayîşî’ de ked û hêzê xozayî yê herême yenê pêşkêşkerdene. Bi nê polîtîkayan yeno waştene ke hem neteweya kurdan parçe biba hem zî kede înan bêra şuxilnayene.”

Aksuyî da zanayene ke kolonyalîzm çîyo winayên o ke hem erdê şarî talan keno hem zî pêro gandaranê ê erdî rê şîdetê giranî keno. Aksuyî vat: ”Kurdîstan de asta cidîye de meseleya ziwabîyayîşî est a. Koyê Cûdîyî de her roje darî birîyenê. Binê nameyê ‘asayîşî’ de daristan û baxçeyê Kurdîstanî yenê vêşnayene. Çemê Dîcle û Firatî vurîyayê bîyê warê ekoqirkerdişî. Coka têkoşînê vera kolonyalîzmî ganî têkoşînêko ekolojîk bibo. Eke kolonyalîstî wazenê erdê te bêbereket bikerê hinî wezîfeyê to yo ti daristan, çem û waranê zîretî bipawe.”