Merkezê Xeberan
Çendêk verê cû Dêrsim de reyna pezkovîyêk pê guleyanê setdwanan kişîyabî. Dewa Yukari Oymaca ya qezaya Mazgêrdî ya Dêrsimî de 12 pezkovîyî merde ameybî dîyene. Pîrê Ocaxê Derwêşî Cemal Pîr Hasan Şanli û Serekê Cemxaneyê Duzgun Babayî Sînan Kirmiziçîçekî vera seyd û qetilkerdişê pezkovîyan de nêrazîbîyayîşê ardî ziwan ser û semedê pawitişê pezkovîyan veng dayî.
‘Êdî goş nêdîyeno bimbarekîya pezkovîyan’
Pîr Hasan Hayrî Şanli qiseykerdişê xo de dîyar kerd ke pezkovî semedê înan bimbarek ê û wina va: “Wayîrê pezkovîyan Sariq Şivan û Munzur Baba yê. Verênê ma wexto ke bidîyayêne pezkovî kişîyenê vatêne ‘Şima qey pezkovîyê Sariq Şivanî kişenê?’ Êdî goş nêdîyeno bimbarekîya pezkovîyan. Ê gandarê tewr rin yê dinya yê. Bi qetilkerdişê pezkovîyan heqaret bi ma û dînê yeno kerdiş. Pezkovîyî verê cû verê berê ma de roniştêne. Înan nêkişnê, heyf û gune yo. Tena dorme ra zilm bi pezkovîyan nîno kerdiş. Mîsal semedê seydê înan destur yeno dayene. Heke pezkovî çin bibî tu qîymetê nê cayan nêmaneno. Ganî selahîyetdarî semedê pawitişê heywanan gamêk bierzê. Ganî komelê sivîl, partîyê sîyasî û şarê ma vera kerdişan de werizê payan ser ke vernîya qetilkerdişê heywanan bêro girewtene.”
‘Seydê pezkovîyan kenê îhale’
Serekê Cemxaneyê Duzgun Babayî Sînan Kirmiziçîçekî zî da zanayene ke elewîtî bawerîyêka muhîm a û wina va: “Pezkovî semedê ma zaf muhîm ê. Ma înan rê vanê ‘Malê Xizirî.’ Verêne ma vatêne ‘Eke pezkovî bêrî qetilkerdene do çîyêko gird bivirazîyo.’ Demanê peyênan de seydê pezkovîyan kenê îhale. Yenê oyanê ma de heywan û gandaran kişenê. Kiştişê pezkovîyan, kiştişê heqîqatê ma yo. Ganî ma înan bipawê û nêverdê ke kesêk zirar bido înan. Tu ferqê kesê ke 38an de şarê ma kiştê û pezkovîyan kişenê yewbînan ra çin o. Ma veng danê rayaumûmîye ke tedbîran bigîrê.”
