Aura Lolita Chávez Ixcaquic endama Consejo de Pueblos K’iche (CPK) ya. Na rêxistinîye têgêrayîşêkê komel û şaran o ke 2007 de vera pederşahîye, emperyalîzm, kolonyalîzm û serdestîya camêrdan bi armancê têkoşînê vera tesîrê Peymana Bazirganîya Serbeste ya mabênê Amerîkaya Mîyanêne û Amerîka (FTAA) awan bîye.
Aura Lolita Chávez Ixcaquica ke beşdara Konferansê Cinîyan ê Mîyanneteweyî yê 2. bibî ANFyî rê qisey kerd. Aura vat: “Ma antî-emeperyalîst ê. Ma erd û cuya xo pawenê. Dewleta Guatemala faşîst a, hêrişê ma kena. Dewlete mi sey terorîste pênase kena. Surgun de şeş reyî ez raştê suîkastî ameya. La reyna zî ez vejîyaya teber û mi têkoşînî rê dewam kerd. Ez têgêrayîşê cinîyan ê kurdan ecibnena. Cinîyê kurdî Jinolojî musnenê ma, no zî hêz dano ma. Coka ez tewra nê konferansî bîya.”
Aura Lolita Chávez Ixcaquic ard ziwan ke înan konferans de bire daye ke vera germîya globale çalakîyan bikerê û seferber bibê.
Aura Lolita Chávez Ixcaquic derheqê hêrişanê vera Kurdistanî û têkoşînê kurdan de zî wina vat: ”Ez zerrî ra vana ke cinîyê kurdî têna nîyê. Ma hêrişanê kîmyewîyan ê vera kurdan şermezar kenê. Têgêrayîşê cinîyan ê kurdan seba pêro têgêrayîşanê femînîstan verarşîyayîşê cuye yo. Ma tewrê kampanyaya vera şuxilnayîşê çekanê kîmyewîyan benê û azadîye wazenê. Seba şarê Kurdistanî, seba wayanê xo yê kurdan ma azadîye û edaletî wazenê. Ganî pêro merdimî seba Kurdistanî edaletî biwazê. Eke Kurdistan azad nêbo qet yew şar azad nêbeno.
Ez zanena ke kurdî zulmêkê senînî vînenê. Ez nêeşkena şora welatê xo çunke dewlete û artêşe wazenê mi bierzê zîndanî û îşkenceyê mi bikerê. Coka ez hol zanena ke çew senî bê binge yeno sûcdarkerdene. Coka ez xopawitiş û têkoşînê Kurdistanî hetî de ya.” BERLIN
