27ê nîsane ra nata Rayberê Şarê Kurdî Abdullah Ocalanî ra xeberêke nêna girewtene. Avûkatanê Buroyê Huqûqî yê Asrinî ra Razîye Turgut îfade kerde ke muwekîlê înan ser o tecrîdêko giran esto û janê Korona zî qesawetê înan zêdîneno. Turgute daye zanayene ke ê tarîxê 11ê adara 2020î ke janê Vîrusê Korona (Covid-19) Tirkîya de vejîya raşte ra nata murcatê Serdozgerîya Komarî ya Bursa û Wezîrîya Edaletî rê kenî û wazenê ke tedbîr bêrî girewtene û şertanê musaîtan de pêvînayîş bêro kerdene, la cewabêk nêdîyeno înan.
Razîye Turgute qiseykerdişê xo de bale ante tedbîranê ke nînê girewtene ser û wina va: ”11ê adara 2020î de wexto ke Vîrusê Korona Tirkîya de vejîya werte ma muracatê Serdozgerîya Komare ya Bursa û Wezaretê Edaletî kerd û waşt ke vera janî de tedbîr bêro girewtene. La ma rê cewabêk nêame dayene. Muwekîlê ma Abdullah Ocalan, Veysî Aktaş, Omer Hayrî Konar û Hamîlî Yildirim binê şertanê xiraban de yê. Nêweşîyê kronîkî yê Birêz Ocalanî zêdêr ê la vera ci tecrîdêko giran esto. 6 mengan ra nata waştişê ma yê seba pêvînayîşî yeno astengkerdene.”
‘Gefê kiştişî ameyî kerdene’
Turgute dewamê qiseykerdişê xo de dîyar kerde ke Birêz Ocalan 10 serran ra nata zîndan de têna mendo û domnaye: “Ameyêne waştene ke îradeyê ci teslîm bêro girewtene. Ci rê cezayê dîsîplînî ameyî dayene, gefê kiştişî ameyî kerdene. Sîstematîk nêbo zî heta serra 2011î avûkat û keye eşkîyayêne pêvînayîş bikerê. Na serre ra dima seba pêvînayîşî destûr nêame dayene. Grevê Leyla Guven ê serra 2018î ra dima pêvînayîşê kilmî ameyî kerdene. La 7ê tebaxa 2019î ra dima pêvînayîşî reyna ameyî astengkerdene.”
‘CPT heta nika bêveng mend’
Turgute tewr peynî qala bêvengîya Komîteya Vernîgirewtişê Muameleyo Xirab û Îşkenceyî ya Ewropa (CPT) kerde û qiseykerdişê xo wina qedênaye: “Ma 18ê nîsane de CPTyî rê muracat kerd la CPT heta nika bêveng mend. tewiro pasîf ê CPTyî yo ke vera erjanê ci yo, beno sebeb ke tecrîdê Îmraliyî xorinêr bibo û qesawet bizêdo. Birêz Ocalanî binê şertanê tewr giranan de zî tim seba azadî xîret kerd. Ocalan vera kerdişanê xiraban nameyê kurdan û şaranê herême ser o xo ver dano. Dewlete polîtîkayanê şerî de israr kena. Eke têkoşînê komelî geş bibo nê polîtîkayî do çin bibê û hêvîya çareserîye rê rayîr beno a.” STENBOL
