Wendekara Unîversîteya Munzurî Gulîstan Dokuya 21 serrî 5 çeleyê 2020î ra nata vindîbîyaye ya. Netîceya xebetanê cigêrayîşî Gulîstane ra rêçêk nêame dîyene û tehqîqatê serdozgerîye zî aver nêşino. Xebata cigêrayîşî yê Pirdê Dinarî û Awbendê Uzunçayirî 6ê temmuze de ameybî qedînayene. La 6ê tebaxe ra dima bi waştişê keyeyê Gulîstane awa Awbendê Uzunçayirî ameye kêmkerdene û xebatê cigêrayîşî newe ra dîyayî destpêkerdene û 18ê tebaxe de bi mehneya ‘awe de nêameya vînayene’ xebat reyna qedînayene.
Dayika Gulîstane Bedrîye Doku û waya aye Aygul Dokuye seba ke nêrazîbîyayîş nîşanê qedînayîşê xebatan dayî 7ê êlule de Raşteyê Seyîd Rizayî de dest bi çalakîya roniştişî kerdî. Bedrîye û Aygule bado ke sozê do waştişê înan bêro caardene 11ê êlule de çalakîya xo qedînayî.
Keye 24ê êlule de wezîrê karê zerre Suleyman Soyluyî reyde pêvînayîş pê ard û waşt ke ê wazenê Serekkomarî reyde zî pêvînayîş pê bîyarê labelê waştişê înan nêame caardene. 15ê êlule de Walîtîya Dêrsimî daye zanayene ke do Awbendê Uzunçayirî de reyna xebatê seba vînayîşê Gulîstane bîdîyê dest pêkerdene.
Sereka Komeleya Cinîyan ya Rosa Adalet Kaya qala 3. xebatê seba vînayîşê Gulîstan Dokuye ke newe ra dîyaye dest pêkerdene kerde. Kayaye daye zanayene ke bi nê xebatan tena yeno waştene ke rojeve bêra meşgulkerdene.
‘Ma aqûbetê Gulîstane nêzanê’
Adalete dîyar kerd ke ê seba aqûbetê Gulîstane xeylêk rey şîyê Dêrsim û wina dewam kerd: “Seba îfadeyî veng nêdayî Zaynal Abarakovî. Bi no hawa wazenê ke xo bi xo çîyêk awan bikerî û vajê ke Gulîstane întixar kerda. Ma aqûbetê Gulîstane nêzanê. Pêwa pêro israrê keyeyî ganî xêrcê awe tu ca de xebata cigêrayîşî nêamî kerdene. Versûcê na hedîse bêcezadayîş yeno xelatkerdene. Her hetê dinya de derheqê cinîyêke vindîbîyaye de yewin cipersayîş derheqê camêrdo ke aye reyde têkilî dayo ro de dest pêkeno. Labelê no welatî de hema vajê çîyêk winasî mumkin nîyo ke bi ca bêro. Çunke tîya de cinî hetê camêrdê ke nêzdîyê înan de yê yenê kiştene.”
‘Vindîkerdişê Gulîstane konseptê şerê taybetî yo’
Adalete dîyar kerd ke ê bawer nêkenê ke Gulîstane întixar kerda, çîyêk bîn esto û wina va: “Pêwa hende xebatê cigêrayîşê seba Gulîstane eke Gulîstane awe ra bêra vetene zî do reyna bibo rewşêke bi guman. Ma do qetî fek persê seba Gulîstane vera nêdê û ma do seba nê her wext biqîrê. Her roje cinîyêke yena qetilkerdene. La demê peyîn de remnayîşê cinîyan û dima ra zî qetilkerdişê înan rewşêka bi guman o. No zî taybetî herêmanê ma de aver şîyo. Ma fikrîyenê ke no zî konseptê şerê taybetî yê dewlete yo. Vindîkerdişê Gulîstane konseptê şerê taybetî yê dewlete yo.”
‘Şîdeto psîkolojîk her ke şono zêde beno’
Adalete dîyar kerd ke cinîyê ke wazenê fek mêrdeyê xo ra vera bidê o wext; desteştiş, tecawuz înan rê yeno kerdene yan zî yenê kiştene û wina va: “Ganî cinî xopawitişê xo aver berê. Ganî no çî her ca de cinîyan rê bêro neqlkerdene. Seba ke hêrişê hemverê cinîyan esto. Ma cinî nê çî zanê û nê gore tê geyrenê. Ma bawer kenê ke cinîyê ke bawerîya înan bi înan biba û bi hêz bê do nê şerî veng vejê.” AMED
