DEDEF û ADEFî seba vîrardişê Dêrsimî yo ke 4ê Gulane de do bêro viraştene veng da. Eşkerayîye de ame vatene: “Wa arşîvî bêrê akerdene, nameyê Dêrsimî apey de bêro dayene û şarê Dêrsimî ra ozur bêro waştene.”
Federasyonê Komeleyanê Dêrsimî (DEDEF) û Federasyonê Yewîyanê Dêrsimî yê Demokratîkî yê Ewropa (ADEF) seba vîrardişê Dêrsimî yo ke 4ê Gulane de do bêro viraştene veng da.
Eşkerayîya DEDEF û ADEFî de ame vatene: “Qeraro ke bi kombîyayîşê Heyetê Wezaretî 4ê Gulane 1937î reyde ameyo girewtene zaf zelal o: Bisîstem û biplan çinkerdişê herêmêk û şarêkî yo. Seba ma Dêrsimijan 4ê Gulane roja sîya ya. Ma wazenê 4ê Gulane Roja Terteleyê 38î ya Dêrsimî de seba merdeyan û vîndîbîyayanê xo dua biwanê, seba vîrardişê înan muman tafînê û mîyazanan vila bikerê. Ma wazenê, no terteleyo ke cografya ma de qewimîyayo bêro zanayene û tarîxê ma, kulturê ma, ziwanê ma wa biciwîyo û bêro ciwîyayene. Ma wazenê 4ê Gulane sey Roja Terteleyê 38î ya Dêrsimî bêro qebûlkerdene. Seba des hezar merdimê bêgunayê ke Dêrsim de ameyê qetilkerdene û seba ke sewbînan 4ê Gulanî meqewimîyê, ma DEDEF û ADEFî 4ê Gulane 2019 (Saete: 19.37/38 ) sere de merkezê Dêrsimî de û her cayê ke ma rêxistinê vîrardiş virazenê. Dostê ma yê ke nêeşkenê tewrê vîrardişî bibê, ma dawet kenê ke keyeyanê xo de muman tafînê.”
Arşîvî bêrê akerdene, şarê Dêrsimî ra ozur bêro waştene
Eşkerayîye de nê waştişî ameyî rêzkerdene:
– Wa Arşîvî bêrê akerdene, nameyê Dêrsimî apey de bêro dayene.
– Wa Şarê Dêrsimî ra ozur bêro waştene.
-Wa Lîsteya surginan, vîndîbîyayan, domanê ke herême ra ameyê berdene û cayê gorê Seyît Rizayî û hevalanê ci bêrê eşkerakerdene.
– Wa Ziwanê ma û Bawerîya ma ya Qizilbaş-Elewîye bêrê naskerdene.
– Wa Munzur de projeyê awbendan bêrê betalkerdene. DÊRSIM
