Kurdî bi serran o ke mîyanê xoverdayîşêko pîl de yê. Xoverdayîş bê bedel nêbeno û bedeldayîş zî çiyêko kêm nîyo. Bitaybetî 40 serranê peyênan de Kurdistan de kesê ke welatperwerî xo rê kerdî esas heme bedel dayî û bi bedelan resayê nê rojan. Hema zî eynî kesî bedel danî. Her keyeyêk perçeyê micadeleyî yo û keno ke bi tewrêk xo ver bido. Koyan ra bigîrên heta deştan ucayî ra zî heta mîyanê şaristanan, heme cayê welatî de bedelî ameyî dayene û nê bedelan ser o micadeleyê azadîye dewam keno. Nimûneyî zaf zaf ê la hewce nêkeno merdim behsê vêrî bikero. Çiyê ke ma nika tede yî nimûneyê en pîl ê. Xoverdayîşo nikayîn ke seba azadîye yeno dayene, ê vêrînan zî gêno mîyanê xo û bedelanê neweyan dano.
Xoverdayîşo nikayîn çalakîya grevê vêşanîye ya. No xoverdayîş vîrê Kurdan de cayêko pîl gêno. Demê derbeyê 12ê êlûle de Kurdî nê xoverdayîşî şinasnayî û ê wextan ra nata mîyanê no micadeleyo derg de bedelan dayî. Azadî bi nê xoverdayîşan hêna bîye nêzdî û micadele bi no qeyde bi pîl. Bi çalakîya grevê vêşanîye ya nikayîn zî do azadî hêna zêde biba nêzdî. Kam vano se wa vajo, bêvengî biba yan nêba, do azadî bi nê xoverdayîşan bêra.
Hemsereka Kongreya Komelê Demokratîk Leyla Guvene bi nê vîr û vînayîşê xo na çalakî da destpêkerdene. Nasir Yagiz eynî vîr û vînayîşî ser o destpê kerd. Zindanan de hezaran hepsî eynî vîr û vînayîş ser o yê. Çar perçeyê Kurdistanî û Ewropa de eynî vîr û vînayîş na çalakî da destpêkerdene. Vîr û vînayîşê komelî înan rê no rayîr mojna ra. Û no rayîr de bedel zî ame dayene. Zulkuf Gezenî bi ruho ke azadî esas gêno canê xo feda kerd. Ugur Şakarî zî eynî ruh esas girewt û canê xo feda kerd. Nika zî Ayten Beçete rayîro ke embazê aye akerdî de şîye û canê xo yo ciwan feda kerd. Bi nê bedelan û bedelê ke do bêrê dayene xoverdayîşêko pîl dewam keno. Û vengêk beno berz; veng bidêne vengê ma!
Keyeyê nê hêrî şehîdan, nameyê înan ser o veng danî heme Kurdistanî. Waştişê înan o ewilin şikîyayîşê bêvengîye yo. Ê zî sey nê şehîdan eynî çiyan wazenî; wa tecrîd bişikyo, wa azadî bêro, wa aşitî bêro… Nê waştişê înan esasê xo de waştişê heme şarî yo labelê her wextan ra hêna zêde bêvengî esta û na bêvengî sere de keyeyan dima ra zî kesanê ke xo sey perçeyê micadeleyî vînenî, tersnena. Aye ra gere wayîrvejîyayîş bibo esas; senî ke çalakgerî vîr û vînayîşê şarî esas girewtî gere şar zî wayîrvejîyayîş xo rê bikero esas. Helbet hêrişî estî, helbet tedayêka pîle esta, labelê tu çiyêk sebeb nîyo ke merdim wayîrê na çalakîye û wayîrê îradeyê xo bivejîyo. Heta ke wayîrvejîyayîşêko pîl nêro nîşandayene do cenazeyî hepisxaneyan ra û cayanê bînan ra bêrî; heta ke wayîrvejîyayîşêko xurt nêro nîşandayene do her cenazeyêk bibo ê keyeyê xo û do adir tena bikewo ê keyayanê ke cenaze şinî. Bedelo ke ma behsê ci kenî ê heme komelî yo; hempar o. Dej hempar o, xemgînî hempar a, adiro ke keweno ê heme keyeyan o, hempar o… Wayîrvejîyayîşê çalakîya grevê vêşanîye nê hemparîyan do bivejo orte. Eke wina bibo do serkewtiş her wextan ra hêna zêde nêzdî bo. La her çi ra ver wa adir tena nêkewo keyeyêk!
