Badê wird erlerzanê girdan ê Mereşî ke bi des hezaran kesan dinyaya xo bedilnaye, Meletî, Dîlok, Mereş, Amed, Semsûr, Hatay, Kilis, Adana, Riha û Osmanîye sey herêmanê afetî ameyî îlankerdene. Dima ra Xarpêt zî tewrê nînan bi. Şarê Çewlîgî bi tagê #BingölAFETbölgesiilanedilsin (Wa Çewlîg sey herêma afetî bêro îlankerdene) gazî keno.
Seke yeno zanayene wird xetê fayî Çewlîg de resenê pê. Coka Çewlîg binê rîskê girdî yê erdlerzî de yo. Xora badê erdlerzê Mereşî heme pîsporî vanê ke ê mabênê qezaya Kanîreş û Çewlîgî de erdlerz pawenê. Rixmo ke Çewlîg sey merkezê erdlerzî yeno zanayene û zaf rey tede erdlerzî girdî qewimîyayî selahîyetdarê dewleta tirke goş vengdayîşê şarî nêdanê û sey herêma afetî îlan nêkenê.
Şarê Çewlîgî wazeno ke bajar sey herêma afetî bêro îlankerdene ke banî bêrê kontrolkerene û tedbîrî bêrê girewtene. Seba ke pîsporî semedê erdlerzê Çewlîgî hîşyar kenê, şar qerqilîyeno, tersene binê banenê xo de bimano. Seba ke felekta ke bajaranê bînan de qewimîyaye wa Çewlîgî de mebo, şar veng dano ke wa tedbîrî bêrê girewtene. Coka wazeno ke wa lezabez Çewlîg sey herêma afetî bêro îlankerdene. Çend rojî ya medyaya sanala de vengdayîşê çewlîgijan çend şino gird beno.
