Endam û îdarekaranê PSAKDyî yê Ataşehîrî vera dersê dînî yê mecbûrî waşt ke verê Dibistana Necatîbeyî de çalakîyêke bikerê la polîsan ê asteng kerdî. Girseyî verê cemxaneyî de eşkerayîyêke daye û waşt ke dersê dînî yo mecbûrî wedarîyo.
Goreyê bira Mehkemeya Heqanê Merdiman a Ewropa ganî wendekarê elewîyî dersê dînî ra muaf bibê la bire hetê hukmatê AKPyî ra nêna caardene. Dezgehê elewîyî vera tewirê hukmatî nêrazîbîyayîşanê xo dewam kenê.
Endam û îdarekaranê Komeleya Kulturî ya Pîr Sultan Abdalî (PSAKD) ya Ataşehîrî ya Stenbolî waşt ke verê dibistana Necatîbeyî de derheqê dersê dînî yê mecbûrî de çalakîyêke bikerê. La polîsan çalakîye asteng kerd. Naye ra dima endam û îdarekaranê Komeleye verê cemxaneyî de eşkerayîyêke daye.
‘AKP bi dersê dînî kadroyanê xo awan keno’
Sereka PSAKDyî yê Ataşehîrî Gulsev Kaya eşkerayîye wende û vat: ”Wa dersê dînî yo mecbûrî bêro wedaritene, wa bira mehkeme bêra caardene. Sey elewîyan heta ke waştişê ma bêrê caardene ma do têkoşînê xo dewam bikerê.” Kaya îfade kerd ke ê tewiranê polîsan zî protesto kenê. Kaya da zanayene ke AKP bi dersê dînî kadroyanê xo awan keno û bi nê hawayî domananê elewîyan asîmîle keno.
Kaya pare kerd ke ronayîşê Komara Tirkîya ra nata vera elewîyan polîtîkayê teda, asîmîlasyon û peygoşîye dewam kenê û beyan kerd ke ê perwerdeyê bi ziwanê dayîke wazenê. STENBOL
