Silêmanî de bi desan nuştox, rojnameger, akademîsyen û sîyasetmedaranê Rojawan û Başûrê Kurdistanî derheqê hêrişanê îşxalî yê dewleta tirke de nîqaşî kerdî. Nîqaşan ra dima hetê Rojnameger û Çimdarê Sîyasîyî Kemal Reufî ra netîcenameyê nîqaşan ame wendene. Netîcename dima do pêşkêşê serekîyanê Iraq û Herêma Kurdistanî bêro kerdene.
Netîcename wina yo:
”-Armancê dewleta tirke îşxalêko pîk o. Goreyê tesbîtan artêşa tirke heta nika herêma Başûrî de 37 baregehê pîlî û 41 baregehê qijî awan kerdî. Ma naye ser o hişyarîyêka tûje danê. Heta nika bombardumananê dewleta tirke de 650 dewî veng bîyî, 34 dewî ameyî vengkerdene û gefê vengkerdişî dewam keno. Artêşa tirke tay cayan de 5 km, tay cayan de heta 30 km derbazê Herêma Kurdistanî bîye. Ganî Parlamentoyê Iraqî verê hêrişanê Tirkîya bigêro.
-Goreyê zanayîşan artêşa tirke bajarekê Başîqa de nêzdîyê 100 kîlometreyan aver şîya, baregehê xo awan kerde û Musilî ra têna 20 kîlometreyan dûr o. Artêşa tirke wazena sînora xo ra ver bi sînoranê Iraqî qasê 30-40 km îşxal bikera û hêzanê xo tde cabikera. Eke wina bo dewleta tirke do Musilî îşxal bikera. Ganî hukmatê Iraqî vera ney serdestîya erdê xo bipawo.
-Ganî Hukmatê Herêma Kurdistanî û Iraqî pawitiş û asayîşê cuye û malanê şarî bikerê. Ganî asayîşê koçberanê ke Başûr de yê û benê hedfê bombarduman û suîkastanê dewleta tirke, bêrê caardene.
-Parlamentoyê Iraqî ganî têkilîyanê xo yê bi Tirkîya newe ra biercno.
-Sersefîrî, temsîlkarê welatan, Temsîlkarîya Neteweyanê Yewbîyayeyan ê Başûrê Kurdistanî ganî mesuldarîyanê xo bîyarê ca û verê îşxalî bigêrê. Xîret bikerê ke meseleya kurdan bi rayîrê dîyalogan çareser biba. Serranê peyênan de 113 hemwelatîyê sivîlî hêrişanê artêşa tirke de şehîd bîyî. Ganî cade hêrişê Tirkîya bêrê vindarnayene û şermezarkerdene.
-Hukmatê Herêma Kurdistanî ganî bi taybetî waranê sotemenî û enerjî de meseleyanê şarî çareser bikero. Ganî qet yew partî, hêz û teref goreyê menfaatanê xo têmegêro.,
-Wa îqtîdarê Herêma Kurdistanî serwerîya erd û şarê xo nêdo binpaykerdene.
-Wa hukmatê Iraqî cuya şarê Herêma Kurdistanî û serwerîya erdê ci nêkero beşêkê nakokîyan û cezakerdişî. Seba kerdişanê selahîyetdaranê Herême ganî şar nêro cezakerdene. SILÊMANÎ
