Vatişê Abdullah Ocalanî yê sey “Ez heme hemrayê xo, ciwan û cinîyê ke xeyalê xo yê azadîye bi şexsîyetê mi reyde kerdê yew û ver bi Amaraye ra rayr şinê silam kena. Ez ewro Amara de şima reyde serê sifreya roje de ya. Ez yew bi yew mîyanê heme hemrayanê xo de ya. Herra ma ya ke tena şahidîya bîyayîşê ma nê şahidîya bîyahîşê heme şaristanîye kerda sere de hemrayanê ma yê cinî û ciwan emanetê şarê ma yê wayîrê hîsê azadîye kena. Bi bawerîya ke pîya welatek azad de yewbînan bivînê, şima verik kena.” Mektuba Abdullah Ocalanî ke 4ê Nîsana 2014î de bi wesîleya rojbîyayîşê xo şirawitbî.
75ine rojbîyayîşê Abdullah Ocalanî rê demêk kilm mend û dewa Amaraye de waya ci Fatma Ocalan û warzaya ci Gulsum Ocalane qisey kerdî.
‘Ma her karê xo pîya kerdêne’
Fatma Ocalane (71) tutîya Abdullah Ocalanî vat û vat ke o tutêk zaf wayîrê hişmedî bî û hîsin bî û wina vat: “Ma pîya xebetîyayêne. Ma fistik arê kerdêne. Ma bostan çinitêne. Ma her karê xo pîya kerdêne. Dima ra seba mektebî şî Dîlok, Nîzîp û dima ra zî şî Anqara. Zimistan teber de hamnan zî dewe de bî. Pîyê mi zaf ci ra hes kerdêne. Xeylê qîmet dayêne. O zî pîyê mi ra zaf hes kerdêne.”
‘Xoza ra zaf hes kerdêne’
Fatmaye nê çîyan vat: “Milçikan ra zaf hes kerdêne. Xozaye ra, vilikan ra zaf hes kerdêne. Girar û do ra zaf hes kerdêne. Dayîka mo ci rê girar û do viraştêne. Bi embazê xo reyde ameyêne. Her tim bi embazê xo reyde bî. Wendiş ra zaf hes kerdêne. Amara de ders dayêne her kesî. O wext Amara ra 20 mamoste vejîya.”
‘Qala cinîyan kerdêne’
Fatmaye dewamê qiseykerdişê xo de nê çîyan vat: “25 serrî tepişte mend. Bi serran ma nêeşkayê şêrê pêvînayîş. Ma wazenê şêrê. Ma rewşa ci nêzanê. Ma weşîya ci nêzanê. Ma wazenê xeberêke bigêrê. Ez 15-20 serrî verê cû şîya pêvînayîş. Wexto ke ez şîya pêvînayîş bi taybetî qala cinîyan kerdêne. Qîmet dayêne cinîyan. Silam cinîyan rê şirawit.”
Fatmaye dewamê qiseykerdişê xo de bale ant serê 4ê Nîsane roja Rojbîyayîşê Abdullah Ocalanî û wina vat: “Verê cu bi hezaran kes ameyêne. La nika nêverdenê kes bêro Amara. Serranê peyênan de qet nêresenê dewe. Ma wazenê 4ê Nîsane de mêymananê xo bihewênê.”
‘Ma baxçeyê keyeyê serekatîye de xeyme akerd’
Birazaya Abdullah Ocalanî Gulsum Ocalana (35) ke qet Abdullah Ocalanî nêdîya, bale ant serê tecrîdê giran û wina dewam kerd: “Tecrîdêk giran est o. Ganî bi lezkî tecrîd bêro peynîkerdiş. Ganî berê Îmrali bêrê akerdiş. Ma 1986 û 2002yî de di reyan surgunê Edene ameyî kerdiş. Dima ke serekatî vat se beno wa bibo ganî şima dewe ra nêvejê, ma tepîya agêrayê Amara û êdî nêvejîyayî. Ma baxçeyê keyeyê serekatî de xeyme akerd, ma hîrê rojan uca de mendî. Leşkeran her tim eştî serê dewe.”
‘Vîrardişê ci ameyêne vatiş’
Gulsume wina va: “Mi bi qiseykerdişê keyeyî serekatî goşdarî kerd. Keyeyê mi vatêne o lîderêk pîl o. Yew vîrardişo ke ameyêne vatiş no bî; serekatî bi tutêk reyde şer keno, dapîra mi Uveyşe vana şo heta ke ti sereye ci nêşiknê meye keye. O zî şino sereye tutî şikneno. Kesêk têkoşer bî. Wexto ke ez hema tute bîya Abdullah Ocalanî rê mi vatêne ‘apo’ dima ra mi va serek. Wexto ke pîyê mi şîyêne pêvînayîş ma xeylê meraq kerdêne. Ma weşîya ci persayêne. Wexto ke çîyêk negatîf bivatêne ez bermayêne. Her çend ke lîderê şarêk bibo datê mi bî, ez hîsin bîyêne.”
‘O zanyar o’
Gulsume qiseykerdişê xo wina qedênaye: “Fikr û felsefeya ci heme dinya de vila bî. O zanyar o. Coka ra tedaya giran serê ci de est o. Ez xeylê fikre ci, kitabê ci ra tesîr bîya. Muhîmîyêke pîl dano cinîyan. Raşteyo ke cinîyan rê akerd de zîncîrê koletîye şikit. Bi meşaleyê ci rayîrê ma roşn bî. Pîrozkerdişê 4ê Nîsane qet xo vîra nêkena û hîsin bena. Ez venga her kesî kesa ke 4ê Nîsane de Amara de dormeyê Roje de bêrê têkişt.”
