Wezareta Karên Hundir a Tirkiyeyê di 22’yê adarê de biryarek da û li gorî vê biryarê jî ji bo kesên ku temenê bi ser 65 salî û kesên nexweşiyên wan ên kronîk hene, derketina derve êdî qedexe ye. Rêxistinên HDP’ê yên navçe û bajaran jî ji bo ku alîkariyê bidin van kesan, xebata alîkariyê dabû destpêkirin. Lê walîtiya Amedê xwe li ber vê negirt û qedexe kir.
Hevseroka HDP’a Peyasê ya Amedê Besîle Narîn têkildarî mijarê axivî. Narîn da zanîn ku duh di saetên sere sibehê de Midûriyeta Polîsan a Amedê li wê geriyaye û jê re gotine ku walîtiya xebata wan a alîkariyê qedexe kiriye û ew jî dê destûrê nedin ku alîkarî bê belavkirin.
Narîn diyar kir ku walîtiyê sedema astengkirina belavkirina alîkariyê jî weke ‘Belavbûna vîrûsa koronayê’ destnîşan kiriye û wiha domand: “Em alîkariyê bi baldarî belav dikin û bergiriyên pêwîst digirin. Heta em bergiriyên xwe negirin, ji xwe em dernakevin xebata alîkariyê. Di pêvajoyên wiha de divê mirov di nav piştevaniyê de be lê xebatên me tên astengkirin.” AMED
