Hikûmeta AKP-MHP’ê di 4’ê hezîranê de parlamenteriya hevseroka KCD’ê û parlamentera HDP’ê ya Colemêrgê Leyla Guven, parlamenterê HDP’ê yê Amedê Mûsa Farisogullari û parlamenterê CHP’ê Enîs Berberoglu betal kir û girtin. Ji parlamenteran tenê Farisogullari niha di girtîgehê de ye.
Li dijî vê darbeya siyasî jî HDP’ê biryar da ku di 15’ê hezîranê de ji du baskan ango ji Colemêrg û Edîrneyê ber bi Enqereyê ve meşeke dirêj li dar bixe. Biryara HDP’ê di serî de serokê MHP’ê Devlet Bahçelî, gelek derdor aciz kir û gef li HDP’ê hatin xwarin. Piştî van gef û bangawaziyên ji bo astengkirina meşê, walîtiya Wanê kete nava liv û tevgerê.
Têkildarî mijarê walîtiyê daxuyaniyek da û ji bo pêşîlêgirtina meşa HDP’ê ya ji Colemêrgê ber bi Enqereyê ve, biryara qedexeya ketin û derketina bajar da.
Walîtiya ku di astên herî krîtîk a belavbûna şewba koronayê de jî tevdîrên pêwîst negirtin û biryara qedexeya ketin û derketina bajar nedayî, sedema biryara xwe jî weke şewba koronayê nîşan da. WAN
