20ê teşrîna peyêna ya 2018î ra nata awanîya Rêxstina HDPyî binê ablûqaya polîsan de ya. Walîtîya Amedî derheqê babete de malumat daye û eşkera kerde ke ablûqaya verê awanîya HDPyî çarçeweya tedbîranê adayîşî de ca nêgêno
Hemsereka Kongreya Komela Demokratîke (KCD) û Parlamentera Partîya Demokratîke ya Şaran (HDP) ya Colemêrgî Leyla Guvene seba wedarnayîşê tecrîdê serê Raberê PKKyî Abdullah Ocalanî dest bi grevê vêşanîye yê bêdem û anêgêrayîşî kerdbî. Guvene 8ê Teşrîna Peyêne de Zîndanê Amedî de dest bi grevê vêşanîye kerdbî û badê ke 25ê Çele de serbest ameyebî veradayene keyeyê xo de çalakîya xo dewam kerdbî. Sewbîna 16ê Kanûne de zîndananê Tirkîye û Kurdistanî de zî çalakîya grevê vêşanîye dest pêkerdbî û 1ê Adare de zî vilayê pêroyê zindanan bibî. Badê çalakîya Guvene 20ê teşrîna peyêna ya 2018î ra nata polîsan awanîya HDPyî ya Amedî bi wesayîtanê zirxinan girewto binê ablûqa. Polîsan roja ablûqayî ra nata dekewtiş û vejîyayîşê taqîp kenî û dîmenan herînenî. Her çiqas ke çalakîyê grevê vêşanîye biqedîyî zî ablûqaya polîsan dewam keno.
HDP na babete Walîtîya Amedî ra persa. Avûkat Mehmet Onerî serê nameyê HDPyî muracatê walîtîye kerdbî. 3ê êlule de walîtîye cewab daye persanê muracatê HDPyî. Walîtîye cewabê xo de daye zanayene ke tedbîrê asayîşî yê ke veng gênî, dîmenê ke ancîyenî û vindetişê polîsan yê verê awanîya HDPyî de çarçeweya tedbîranê asayîşî de ca nêgênî. AMED
