Walîtîya Stenbolî derheqê nîşankerdişê keyeyanê elewîyan de eşkerayîyêk kerde û vat nuşte hetê cîranêka elewîyan ra û semedê xusumetê çop û aîdatî ame nuştene
Qezaya Sultangazî ya Stenbolî de perey apartmana bi des daîreyan de berê 3 keyeyanê elewîyan ser o nuşteyê ”Şima do bimirê” ame nuştene û berî ameyî nîşankerdene. Serebût ra dima keyeyan gerra kerd. Polîsan apartman de cigêrayîş kerd, rêçê engiştan girewtî û kamerayî kontrol kerdî.
Walîtîya Stenbolî derheqê serebûtî de eşkerayîyêka nuştekîye kerde û vat ke nuştê hetê cinîyêka bi nameyê Î.G. ya ke cîrana nê keyeyanê elewîyan a ra ame nuştene û Î.G. ameye destbendkerdene. Goreyê eşkerayîya walîtîye serebût semedê xusumetê aîdat û çopî ra vejîya û Î.G. seba ke cîrananê xo bitersna wina nuşt. Walîtîye îfade kerd ke bingeyê serebûtî de mezhebperestîye çin a.
Serekê Cemxaneyê Pîr Sultan Abdalî Zeynel Odabaşî zî derheqê serebûtî de vat: “Vera elewîyan şîdetêko bi zanayîşî zêde beno. Wextêkê dergî ra nata serebûtê winasênî yenê meydan. Bi vatişê ‘xusumetê cîranan’ no hêriş nêno eşkerakerdene. Ma do nê serebûtî taqîb bikerê.” STENBOL
