Newroza Wanî binê Kelaya Wanî de pê beşdarîya bi se hezaran kesan dewam kena. Girseyî bendî rakerdî û tewrê şayîya Newroze bi. Qerebalix vera zêdîyeno û warê Newroze pê sloganê ‘Biciwîyo Serek Apo’ zimîyeno.
Qiseykerdişê Komîteya Amadekarîye ra dima hunermend Azad Bedran vejîya sehne ser û dima zî adirê Newroze ame tavistene. Cinî û ciwanan wextêkê dergî serê adirî ra xo eşt.
Serekê Komeleya Cinîyan a Starî Serape Guven qisey kerd û wedaritişê Peymana Îstanbulî şermezar kerde. Guvençe vat: ”Ma sey cinîyan vera sîstemê serdestîya camêrdan têkoşînê xo dewam bikerê.”
Şayîye pê wendişê mesajanê zîndanan dewam kerde.
Serekê Pêroyî yê Partîya Merdiman û Azadîye (PÎA) Mehmet Kamaçî qisey kerd û vat: ”No şar qet vera zulmî milê xo çewt nêkeno. Heta ke meseleya kurdan çareser nêba kes rehet nêkeno.”
Dima Wekîlê HDPyî yê Wanî Sezaî Temellîyî qisey kerd û bale ante grevê vêşanîye yê tepişteyan ser. Temellîyî vat: ”Ewro zîndanan de sey Selahattîn Demîrtaş û Gultane Kişinak tepişteyê sîyasîyî estê. Şexsê înan de ez Newroza pêro tepişteyan fîraz kena. Rayîrê çareserîya meseleya kurdan Îmraliyî ra derbaz beno. Wa kes nêgêro senaryoyêkê bînî, muxatab Birêz Ocalan o.” WAN
