Vîrusê Korona Covîd-19î yo ke peynîya menga kanûne de Çîn de vejîya meydan û desan welatan de vila bi, şaristanê Wanî yê Kurdîstanî de zî bi semedê ters û qesawetêkê pîlî.
Wan de zaf maskeyî yenê rotene. Her çiqas berê sînorî yê Kapikoyî bazirganî rê girewte yo, dekewiş û vejîyayîşê berê sînorî ra bi makîneya termale yenê kerdene.
Seba ke ters û qesawetê şaristanî bîyî zêdêr, Walîtîya Wanî rojnamgerî kerdî hedef û vat: ”2-3 kesî estê ke benê semedê panîkî.”
Wan de nika çar kesî nêweşxaneyan de yenê dermankerdene. 3ê înan beşa servîsê lezabezî de yew zî beşê normalî de yo. Her çar kesî zî Îranî ra derbazê Wanî bîyêne. Yeno vatene ke kesê ke servîsê lezabezî de yê birayê yewbînan ê.
Serekê sendîkaya SESî yê Wanî Sezer Orenî derheqê babete de zanayîşî dayî û ard ziwan ke berê servîsê lezgînî yê nêweşxaneyî ganî cayêkê bînî de bibo.
Orenî vat: ”Nêweşê gumandarî û nêweşê normalî hema berî xebitnenê.
Îranî de bi rayîrê qaçaxî merdimî derbazê Wanî benê û vîrus bi nê hawayî vila beno. Rewşêka winasêne de têna giretişê berê sînorî çareser nîya. Krîterê hîjyenî ganî bêrê caardene, komê birîskî bêrê eşkerakerdene û hacetê pawitişî zî bêrê peydakerdene.
Ganî selahîyedarî eşkerayîyêka zelale bidê. Vaya maskeyan bîye zêdêr û nê maskeyî kesêk nêpawenê. Ganî bîlanço bêro eşkerakerdene û zanayîşî bêrê dayene.” WAN
