Kanîreş qezayêka Çewlîgî ya. Dormeyê Kanîreş pê koyan girewte yo û nameyê ci hetê dewleta tirke ra serra 1938î de sey Karliova vurîya. Koyê Koxî, Koyê Çavreşî, Koyê Şerefdînî û Koyê Qertalixî dormeyê Kanîreşî gênê. Kanîreşî serra 1925î de Şêx Seîdî rê meymanîye kerde.
Bi hezaran ciwan, cinî û camêrdanê Kanîreşî verê xo da koyanê Kurdistanî û têkoşînê gerîlayan de ca girewt. Kanîreş pê ware û kanîyanê xo yê rengînan, pê erd û şarê xo rayîrê rûmetî de şino.
Ma serê sibayî rew verê xo danê halînê koçeranê wareyanê Kanîreşî. Wexto ke merdimî qala wareyan kenê xora reya verêne Koyê Şerefdînî yeno vîrê ci. Darahêni ra dima ma resayî Çewlîg, wareyanê Çewlîgî pê vilikanê xo ma pêşwazî kerd. Wexto ke ma kewtî rayîrê Kanîreşî ma pê rindîya daristanê Qerecehenemî mest bîyî. Xoşebera hemwelatîyan ra dima ma şinê çemêkê koyê Qertalî. Awa çemî herîkîyena şina çemê Mûradî. Sereyê koyê Qertalî de hema zî vewre esta.
Koyê Koxî zî cayêk o ke merdimî pê ewnîyayîşê ci mird nêbenê
Kanîreşo ke wareyê ci namdar ê, tewr zaf Wareyê Şerefdîn û wareyê Çewlîgî namdar ê. Wareyê Xirxal û Wareyê Çavreşî zî qeza de yê. Hegmînê nê cayan zaf namdar o. Çemê Pêrî, Çemê Gonigî, Çemê Kêşî zî rindîyanê Kanîreşî ra yê.
Wareyan de şarê Çewlîg û Kurdistanî koçberîye kenê. Herêma Kanîreşî de 4 dewî estê ke înan ra tay dewî zî dewê elewîyan ê. Wexto ke ma gola Gelbehrî ra agêrenê dewa Qerqebazarî ma rayîrî ra rastê dewêka elewîyan yenê. Ma seba agêrayîşê Amedî reyna verê xo danê merkezê Kanîreşî. Roje şina awan û hînî hewa beno serd. Koçerîye tewr zaf wareyanê Kanîreşî de weş a. ÇEWLÎG
