Leyla Guvene 97 rojî yo grevê vêşanîye de ya. Keynaya Guvene Sabîha Temîzkane daye zanayene ke maya ci aye ra vata: “Ez zana ke waştişê mi zerrîya bi mîlyonan merdiman de zî esto. Ez hêzê xo zî na bawerî û heqdarîye ra gêna.”
Hemsereka KCDyî û parlamentera HDPyî ya Colemêrgî Leyla Guvene, seba tecrîdkerdişê Rayberê Şarê Kurdî Abdullah Ocalanî biqedîyo, 97 rojî yo ke grevê vêşanîye yê bêdem û bêagêrayîşî de ya. Keynaya Guvene Sabîha Temîzkane ke maya xo dir manena, qalê halê weşîya aye kerd.
Temîzkane ard vîrî çalakîya grevê vêşanîye yê maya aye roja xo ya 97. de yo, naye ra ê mecbûr ê ke meseleyê pakîye de xeylî hesas bê.
Bi zehmetîye qisey kena
Temîzkane ard ziwan babeta serdane de zî ê xeylî hesas ê û va: “Ma hendî nêeşkenê tu serdanêk qebûl bikerê. Sere de xeylî kesî ameyêne serdane. Na yewe moral dayêne maya mi. Ma kerd ke vernîya ci nêgêrê. La nika seba ê kesanê ke yenê ma maske danê. Hetêna ra destê xo zî dezenfekte kenê. Bi nê hawayî ma sere de serdanî qebûl kerdêne. La nika halê weşîya maya mi rayîr nêdano ke merdimî bêrê serdana ci. Xora ancax bi hetkarîya ma eşkena rayîra şiro û bi zehmetîye qisey kena. Rojanê destpêke de seba ke xeylî kesî ameyî serdane, xeylî halî ra kewte. Dimayo ke zîndanî ra vejîyaye hîna zaf kîlo daye. Maya mi nêeşkena binîzam rakewo. Ez aye dir a û timî kontrol kena. Bişewe zî nêeşkena rakewo. Sey merdimanê aleladeyan nêeşkena rakewo, nîşka ra ceniqîna û haya bena.”
Tansîyona ci tim kemî ya, masûlkeyê ci helênê
Temîzkane dîyar kerde ke maya aye saet 7 de bena haya û va: “Nêwazena ma haya bikero. La gama ke ma vînenê aye haya bîya ma zî hurzenê xo ser. Saet 9 de dest bi şimitişê awe kena. Dima ra zî rojdemî şopnena. Rojnameyê Yenî Yaşamî binîzam yeno keye. Ma aye rê meqale û xeberan wanenê. Ge-ge bi zehmetîye kena ke televîzyonî temaşe bikero, la xeylî zehmet o. Seba ke roşnayî ci rê zehmetîye dana wextêko derg nêeşkena temaşe bikero. Hetêna ra dejê masûlkeyanê aye bîyê vêşî, seba ke helênê. Dejêko giran keweno sereyê aye. Tansîyona aye timî kemî ya. Seba boyedayîşî zî xeylî hesas bîya. Xora keye de bi tu hawayî wer nêno pewtene. Boya weranê cîranan zî yeno nay era madeyê aye aciz beno. Boyêka taye ya parfumî zî tesîrêkê bi heman hawayî keno.”
Zelal nêyo ka do se bo
Temîzkane daye zanayene maya aye mîyanê roje de zafane dergkerde ya û wina dewam kerd: “Ma kenê ke aye dir bitereqîyê, yarîyan bikerê. Moralê maya mi berz o. Çirey nêvana ke halê aye xirab o. Gama ma reaksîyonanê wucûdê aye nêşopnê, maya mi nê meseleyî de çîyêk nêvana. Heta aye ra yeno wazena ke verê ma de xo bihêz ramojno. Bi îradeyêkê xeylî xurtî xover dana. La rasta ci, nê halî xeylî derg dewam kerd. Maya mi 55 serrî ya û her roje ez hîna zaf tersena. Zelal nêyo ka do key se bo. Ez xeylî tersena û biqesawet a ke her game de beno ke çîyêk bi wucûdê aye bibo.”
Ez hêzê xo heqdarî û bawerîya xo ra gêna
Temîzkane ard ziwan ke merdimê ke yenê verê berê keyeyê înan û paştî danê xeylî erjaye yê û va: “Maya mi zî bi nê hawayî fikrêna. Çend rojanê sereyî de bi zehmetîye bo zî vejîyayêne balkone ke merdiman silam bikero. Dima ra hendî nêeşkaye vejîyo û xeylî kewena nê ver. Qe nêbo wazena silamêk bido, la hêzê ci qîm nêkeno. Maya mi çalakîyanê paştîdayîşî yê bi nê hawayan ra xeylî hêz gêna. Ge-ge gama ma aye ra vanê ‘tirêm no paştîdayîş kemî yo?’ aye vana, ‘Nê. Ez bi nê hawayî nêfikrêna. Bi vînayîşê mi paştîdayîşêko rind esto. Beno ke no xo zaf kuçeyan de nêmojno ra la waştişê mi zerrîya bi mîlyonan merdiman de dano piro. Ez hêzê xo na heqdarî û bawerîye ra gêna.’ Maya mi xoverdayîşo ke bi tena sereyê xo da destpêkerdene bi hemrayanê xo domnena. Embazê ke zîndanan de yê û Ewropa de yê zî dest bi grevê vêşanîye kerdî, no hêz û moralêkê pîlî dano aye.”
Biqera a ke xoverdayîşê xo bidomna
Temîzkane ard ziwan ke maya aye tim vana: “Heqê Ocalanî yo ke sey tepişteyêk keyeyê xo dir û avûkatanê xo dir pêvînayîşan virazo. No heqêko qanûnî yo. Heta ke no waştişê mi nêro qebûlkerdene, ez biqerar a ke xoverdayîşê xo bidomnî.”
Ganî ma bibê vengê nê mucadeleyî
Temîzkane peynîya qiseykerdişê xo de nînan va: “Maya mi xo nê meseleyî ra mesuldare vînena, naye ra wazena tavilî cewabê waştişê aye bêro dayene. Maya mi rixmo ke bi zehmetîye awe şimena, ancî zî zor dana xo. Seba ke cuye û tewirê aye xeylî muhîm ê. Seba ke waştişê aye rê cewab bêro dayene, nê xeylî muhîm vînena. Naye ra zî xeylî cehd kena. Ma qalê xoverdayîşêkê bi nê hawayî kenê. Ganî ma bibê vengê nê mucadeleyî yê seba cuye. Ganî her kes nê vengî berz bikero.” AMED
