HDP semedo ke tayê bajaran û qezayanê kurdan de weçînayîş newe ra bibo, îtîrazê Heyetê Weçînayîşê yê Berzê (YSK) kerdo. Tu yew îtîrazê HDP qebul nêkerdo. Mazgîrê Mûşî de namzetê AKP, namzetê HDP ra 3 ray vêşî girewtbê. Yûsûselîyê Artvînî de namzetê AKP, namzetê CHP ra 3 ray vêşî girewtbê. Hem HDP û hem zî CHP semedo ke, hem Mazgirî de, hem zî Yûsûselî de weçînayîş newe ra bibo, îtîrazê Heyetê Weçînayîşê yê Berzê (YSK) kerdo, YSK nê wirdî îtîrazî qebul nêkerdê. La îtîtîrazê yê Stanbulî tede, îtîrazê AKP/MHP qebul bîyê.
Ganî Heyetê Weçînayîşê yê Berzê (YSK), bêteref bibîynî û goreyê heq û huqûqî têbigeyraynî. La çi heyf ke weçînayîşê 31ê Edare 2019î dima, Şaredarîya Rezanê Amed, qezayanê Edremîtî, Tûşbayî, Çaldiranî û Beypinarê Qezayê Dîgor de; mazbata ke namzetanê hemserekanê Şaredaranê HDPyan bi rayanê şarî heq kerda, girewta daya namzetanê AKPyan. Hemserekê şaredaranê bajaran û qezyan tede, bi desan mazbataya endemanê meclîsanê HDPyan îptal kerda.
Îptalkerdişê weçînayîşê Stanbulî dima, Heyetê Weçînayîşê yê Berzê (YSK), terafê xo resmen bellî/dîyar kerdo. Aseno ke Heyetê Weçînayîşê yê Berzê (YSK), goreyê talîmatê Serekkomar Recep Tayyîp Erdoganî û hukmatê AKP û Ortaxê înan MHP têgeyreno. Xora heme kes zano ke Tirkîye de, heme waran de hine heq-huqûq nêmendo.
Weçînayîşê 31 Edare de çar weçînayîşî bîyê. Pûsûleyê weçînayîşê Şaradaranê qezayan, şaradaranê bajaran, endamanê meclîsanê şaredarîyan û ê mûxtaran debîyê yew zerf. Yewna hetra êndamê heyetê sandiqan, Heyetê Weçînayîşê yê Qezayan, Heyetê Weçînayîşê yê Bajaran û Heyetê Weçînayîşê yê Berzî eynî merdiman ra yenê meydan. Eke hîle bîyo se, eke yew bêqanûney bîya se, ganî tena weçînayîşê şaredarîya pîlî/girdi nê, ganî heme hîrê weçînayîşê bînî zî betal/îptal bibîynê. Yewna het ra 24 Hezîrane 2018 de, Weçînayîşê Sîstemê Serekkomarîye de zî eynî merdiman heyetê endamê yê sandiqan de ca girewt bi. Semedo ke no weçînayîş de Recep Tayyîp Erdoganîn bi serekkomar, îtîrazê nê weçînayîşî nêkerd. Aseno ke ewta de, resmen distandartey esta.
Yewna hetra eke weçînayîşê Stanbulî, AKP qezenc bikerdnî Îmamoglûyî zî îtîraz bikerdnî, Heyetê Weçînayîşê yê Berzê (YSK), no îtîraz qebul nêkerdnî. Ewta de aseno ke Heyetê Weçînayîşê yê Berzî (YSK), temamen bi zerwaştişê xo têgeyreno. Eke ina/wina hewa dewam biko, weçînayîş bêmana beno. Goya vanê ke; “Ma îradeyê şarî esas gênê.” Na rewşe ra aseno ke, hinê îradeyê şaran, tena qalan de mendo.
Wezîrê Karê Zerreyî Suleyman Soylû zî vano ke; “Semedo ke huzûr ameyo heremî, şar dewamkerdişê huzûrî wazeno. Panc serrî yê ke ma ra ver î zî ma ke wina bikê/bikerê, bi hewayêko zelal vana ke, ko şaradarîyê HDP nêmanê.” No vatiş de yew şik û gûman esto. Gelo nêtê înan esto ke, rayna qayûman tayin bikê/bikerê? La yewna raştey esta, îqtîdarê AKP/MHP, çendi heq-huqûq ra dûrî bikewê, endi emre înan kilm beno. Xora weçînayîşê 24ê Hezîran de ko heme çîy vejîyo raşte. Eke CHP û Ekrem Îmamoglû yew şaşey nêkê, ko Stanbulde rayanê xo hina vêşî bikê/bikerê Raşta ey eke kurdan ra nêbo, Stanbul de serkewtişê Îmamoglûyî mumkun nêaseno. Aye ra CHP, ganî kurdan û hesasîyetanê kurdan zî bigêro çiman ver. Hinê politikaya AKP/MHP bazar nêveynena. Hetan eyro, AKP û MHP pey dîn û nîjadperestîye siyaset kerdo. Hetan eyro dabanê xo, bi Dînê Îslamî û nîjadperestîye xapînayo û rayê înan girewtê. La hinê aseno ke AKP mîyan de zî hinê na poltîka rexne bena. Hinê dabanê AKP/MHP zî na polîtîka ra eciz bîyo. Serekkomar Recep Tayyîp Erdogan, derûdorê AKP û MHP, hetan eyro bi polîtîkaya şîddetî, bi tehdîtan îqtîdarê xo dewam kerdo. La hinê ne tehditî, ne zî politikaya şerî, hinê pere kena. Şaranê Tirkîya, na polîtîka ra zaf zirar dîyo. Bi zor, bi tehdîtan hine nişnê rayan bigêrê. Bi na politikaya xo, kurdî vînî kerdê. Yewna het ra rojawan de zî Enqera, Stanbul, Edna, Mersîn, Antalya zî vînî kerdê. 24 Hezîran de zî bi temam vênî kenê. Çunku Stanbul de, na ray zî vênî bikê, hinê nişnê payra vindrê.
AKP MHP, bi na politikaya xo, Tirkîye de; tena qrîzanê ekonomîy û ê sîyasîyan vejenê. Hêvîya şaranê Tirkîya, bi tifaqa AKP û MHP nêmenda. Na zî eşkara ya ke, hem îqtîdarê AKP û hem zî partîya MHP, tena menfeetê xo yê sîyasî û ê ekonomîyî esas gênê. 24ê Hezîrana 2019î de, weçînayîşê Stanbulî de, ko cewabê xo bigêrê.
Nuşteyê Binî: Ziwanê ma, heme qîymetanê ma xo de hewîneno. Wexto ke ziwanê ma bihelîyo, netewê ma zî helîno û vînî beno. Ziwanê ma estbîyayîşê ma yo. Ma ziwanê xo, bêwayîr û bêkes nêverdê. Bêrê ma ziwanê xo rê wayîr vejîyê. 15ê Gulane Roşanê ziwanê kurdkî pîroz bo.
