Wekîla HPDyî ya Amedî Dersim Dage û panc endamanê partîye seba ke reaksîyon bidê bêvêngîya hukmatî ya grevanê vêşanîye, yê ke semedê wedartişê tecrîdê serê Ocalanî yenî viraştene, dest bi grevê vêşanîye kerd.
Roja 116. ya grevê vêşanîye yê Leyla Guvene de wekîla Amedî Dersim Dage zî tede 6 endamanê HPD’yî dest bi grevê vêşanîye kerd. HDPyî bi eşkerayîyêk da zanayene ke wekîle Dersim Dage û endamê partîye Bîlal Ozger, Îsmet Yildiz, Salîh Canseven, Salî Tekîn û Sevîcan Yaşare ewro Amed de dest bi grevê vêşanîye yê bêdem û bêagêrayîşî kerd.
Eşkerayîyeka Salona Konferansî ya Vedat Aydinî de ameye dayene hemserekê Pêroyê DBPyî Mehmet Arslan û xeylî parlamenterê HDPyî tewrê ci bîyî.
Mehmet Aslanî bale ante grevê vêşanîye û tecrîdî ser û va: “Bi qetilkerdişê Kurdan aşitîye û azadîye nînê na herre. Şarê Kurdî tecrîdê serê Ocalanî qebûl nêkeno. Ganî heme hetê demokrat û welatperwerî xoverdayîşê Kurdan rê wayîr bivejê û waştişê xoverdayoxan cade berê ca. Heta ke tecrîd mêro wedartene çalakîyî bi girdbîyayîşî do vila bibê.”
Dersim Dage zî Leyla Guvene û heme xoverdayoxê grevê vêşanîye silam kerdî û va: “Waştişê Guvene waştişê ma yê. Coka ma zî dest bi grevî kenî. Xoverdayîş tarîxê ma yo. Sere de Birêz Ocalan heta ke tecrîdê serê cinîyan ciwanan mêro wedartene no xoverdayîş do dewam bikero. Peynîya ci senî bena wa bibo no xoverdayîş do ser bikewo. Biciwîyo Leyla Guvene, biciwîyo xoverdayîşê zîndanan , biciwîyo xoverdayîş.” AMED
