Wekîlê Koma Çepe û Endamê Parlamentoyê Ewropa (PE) Pernando Barrenayî şert û mercê tecrîdî û azadîya Rayberê Şarê Kurdî Abdullah Ocalanî ANFyî rê ercnayî.
Barrenayî vera tecrîdê Îmraliyî nêrazîbîyayîşê xo mojna û ard ziwan ke şertê Îmraliyî dûştê qanûnan ê. Barrenayî vat: ”Tecrîdê Îmraliyî neheqîyêk a. Ocalan 25 serrî yo Îmrali de tepişîyeno. Dinya ser de nimûneyêka bîn a sey Îmraliyî çin a. Şertê tepişîyayîşê Mandelayî zî hende giran nêbîyî.”
Barrenayî îfade kerd ke hînî tepişîyayîşê Abdullah Ocalanî ganî nêro qebulkerdene û vat: ”Şert û mercê tecrîdî qetî rewşêk a ke hetê pêro heqanê merdiman ê mîyanneteweyîyan ra yenê redkerdene. Xeylêk kesî vera cezaya dardekerdişî ya. La ganî cezaya muebede zî nêra qebulkerdene.”
Barrenayî Abdullah Ocalan sey ‘warê mîyanneteweyîyî de referansêkê polîtîkî’ pênase kerd û vat: ”Abdullah Ocalan mîyanê rayberanê dinya de referansêko sîyasî yo. Abdullah Ocalan merdimêko winayên o ke seba azadî û haştîye têkoşîn kerdo. Paradîgmaya ey û pêşnîyazê ey ê konfederalîzmê demokratîkî seba caardişê haştîye, seba ameyoxê ma û heqanê şarê kurdî gamêka destpêke ya girîng a.” BILBOA
