Girseyek ji gelê Amedê ji bo piştgiriya bi Leyla Guven ber bi girtîgeha Tîpa E ya Amedê ve meşiyan. Lê polîsan mudaxeleyî meşê kir û parlamenterên HDP’ê jî di nav de hin welatiyan derb kirin
Çalakiya hevseroka KCD û parlamenetera HDP’ê ya Colemêrgê Leyla Guven ku di 8’ê mijdarê de li dijî tecrîda li ser Rêberê Gelê Kurd Ocalan dabû destpêkirin, di roja 64’an de berdewam dike. Ji bo balkişandina li ser tecrîd û rewşa li girtîgehan îro bi pêşengiya HDP’ê li 100 navendan civînên gel bên li darixistin û di 19’ê çileyê de jî mîtîng bên lidarxistin. Di vê çarçoveyê de komîteya amadekar civîna gel li dar xist.
Piştî civîna ku hat lidarxistin parlamenterên HDP’ê jî di nav de gelek kes berê xwe dan Girtîgeha Tîpa E ya li Amedê ku Leya Guven lê girtî ye. Girse bênavber dirûşma ‘Leyla Guven rûmeta me ye’ û ‘Bijî berxwedana zindanan’ berz kirin. Lê polîsan di nav kolanên li ber girtîgehê de pêşiya komê girt û mudaxele kirin. Polîsan parlamenterên HDP’ê û welatiyan derb kirin.
Tevî hemû astengiyan jî parlamenter Semra Guzel heta ber Girtîgeha Tîpa E ya Amedê meşiya û ligel hemû astengkirin jî Guzel daxuyaniyeke kurt da. Guzel di daxuyaniya kurt de ev tişt anî ziman: “Em îro ji ber daxwaza gelê xwe hatin. Lê hatina me hate astengkirin. Em ê bimeşin ber girtîgehê û heta ku tecrîd bi dawî bibe em ê têkoşîna xwe bidomînin.”
Piştî daxuyaniya Guzel, girse bi çepik û sloganan ji ber girtîgehê veqetiyan. AMED
