Şêwekar Cûma Kerîm û çalakvana civaka sivîl Şeyma Ednan dagirkeriya dewleta tirk a li Başûr û bêhelwestiya hikûmeta herêmê şermezar kir. Welatiyan got ku divê gelê kurd yekitiya xwe ya neteweyî ava bike û li hemberî dagirkeran bisekine
Gelê başûrê Kurdistanê li dijî dagirkeriya dewleta tirk bi bertek e. Welatî naxwazin ku dewleta tirk bikeve nava axa başûrê Kurdistanê û li hemberî bêdengiya hikûmeta Başûr jî bi bertekin. Têkildarî êrîşên dewleta tirk û dagirkeriya wan, şêwekar Cûma Kerîm û çalakvana civaka sivîl Şeyma Ednan axivîn. Axaftvan li dijî dagirkeriyê, banga yekitiya kurdan dikin.
Cûma Kerîm anî ziman ku êrîş û dagirkeriya dewleta tirk a li ser temamiya gelê kurd zêde bûne û wiha domand: “Bi taybet jî êrîşên wan ên li dijî gelê Başûr pir zêde bûn. Ev êrîş bi armanca teslîmgirtina Tevgera Azadiya Kurdistanê û dagirkirina Başûr tên kirin. Lê rojane gerîla li hemberî dagirkeran şer dikin û derbên mezin li wan dixin.”
Bêdengiya hikûmeta Başûr şermezar kir
Di berdewamê de jî Kerîm bêdengiya hikûmeta Başûr a li hemberî dagirkeriya dewleta tirk şermezar kir û wiha pê de çû: “Ez helwesta aliyên ku çavê xwe ji dagirkeriyê digrin şermezar dikim. Divê li hemberî dagirkerî û komployê hişyar bin û xwedî helwest bin.”
Bang li gelê kurd kir
Çalakvana civaka sivîl Şeyma Ednan jî di serî de dagirkeriya dewleta tirk şermezar kir û wiha got: “Ez bang li temamiya gelê kurd dikim ku yekitiya xwe ava bikin û li hemberî dagirkeran bi hev re bisekinin. Armanca dewleta tirk dagirkirina her çar parçeyên Kurdistanê ye.” SILÊMANÎ
