Dêrsim de 14ê sibate de sereştişanê keyeyan de 7 wendekarê unîversîte bi îdîaya ‘endamîya rêxistine’ û ‘propagandaya rêxistine’ ameybî binçimkerdene. Yewê înan bi şertê kontrolê edlîyî 7 wendekarî vizêr ameyî veradayene. Wendekarê unîversîte yê Dêrsimî dîyar kerdî ke binê çiman de ajanî înan rê ameyo pêşnîyazkerdene û çalakîyê seba Gulîstan Dokuye û ê tecrîdê serê Rayberê PKKyî Abdullah Ocalanî sey suc ameyî hesibnayene.
Ajanî ame pêşnîyazkerdene
Wendekaran ra Şiyar Şevlî seba reaksîyon nîşanê binçimkerdişan bido kewt grevê vêşanîye û wina qisey kerd: “No prosesî de şeker nêdayî ma. Tay kesê ke Mudirîya Polîsan ra ameybî waştî ke ‘sohbetêko taybet’ ma reyde bikerî. Labelê embazê a qebul nêkerdî. Ma zanayê ke do ajanî bêro pêşnîyazkerdene. Dima ra vendayî 4 embazanê ma. Çalakîyê seba Gulîstan Dokuye ameyî hesibnayene, ma rê pers kerdî. Çalakîyan sey suc hesibnayî. Heme çalakîyê ke ameyî kerdene, qanûnî bî.”
‘Ma eşkenî zerre û teber de çay bişimnî’
Mustafa Abdalogullari zî da zanayene ke binê nameyê ‘Mulakatî’ de waştî ke ma reyde pêvînayîş bikerî û wina dewam kerd: “Mi rê vatî ‘ma eşkenî îmtihananê to de to rê hetkarî bidî. Ma reyde teber û zerre de eşkenî çay bişimnî. Ma yewbînan bivînî.’ Ma zî înan rê wina va ‘Ez eksê şima de ya. Lazimîya mi bi hetkarîya kesêk çin a.’ Heme çalakîyê ke ameyî kerdene, sey suc hesibnayî.”
Verê cû zî wendaran remnayêne
Abdalogullari qiseykerdişê xo yê peyênan de înan va: “Dêrsim de vera wendekaran de zextê zêde estî. Verê cû zî wendar ameyêne remnayene û ameyêne tehdîtkerdene. Hewl danî ke bîyayîşê kurdanê tîya înkar bikerî. Heqê ma yê esasî çi bibo, ma do înan biwazî û ma do pawitişê xo pê bîyarî.” DÊRSIM
