Dêrsim de 14ê sibate de 7 wendekarê unîversîte ameybî destbendkerdene ke endamê Meclîsê Ciwanan yê Partîya Demokratîke ya Şaran (HDP) yê. Vizêr îfadeyê wendekaran ameyî girewtene. Yeno pawitene ke ewro wendekarî sewqê mehkeme bibê. Wendekaran Mudirîya Asayîşî ya Dêrsimî de vera binpaykerdişanê heqanê merdiman dest bi grevê vêşanîye kerdî. Endamanê Meclîsê Ciwanan yê HDPyî derheqê babete de bînaya HDPyî ya Dêrsimî de eşkerayîyêke dayî.
Lîder Polatî bi nameyê endamanê Meclîsî eşkerayîye wend û da zanayene ke AKP-MHPyî bi seba ke têgêrayîşê sîyasî yê kurdan tasfîye bikero bi hawayêkê sîstematîkî hêrişsnê xo domnenî û destbendkerdişan kenî. Polatî ard ziwan ke her roje vera ciwanan teda û îşkence zêdîyena û va: ”Vera meclîsê ma yê ciwanan konseptêko taybet yeno kerdene. Kongreya ma ya 4. ha bena nêzdî û her roje embazê ma yenê destbendkerdene û tepiştene. Ma do têkoşînê xo dewam bikerê û xebatanê xo dewam bikerê. Embazê ma yê ke ameyî destbendkerdene zî ganî cade bêrê veradayene.” DÊRSIM
