Weşanxaneyê Roşna ke heta nika xeylê kitabê Kirmanckî çap kerdî, 3 kitabê neweyî yê bi Kirmanckî erşawitî metbea. Nê kitaban ra yew Deyîran û Manîyanê Gêlî ray ê Şahab Laçînî, yê dîyin bi nameyê Hîrê Nameyî yê Huseyîn Karakaşî û hîrêyin zî bi nameyê Ez Kirdon rê Vona yê Xal Sebrî yo
Weşanxaneyê Roşna ke bitaybetî eseranê Kirmanckî weşanena, 3 kitabê neweyî erşawitî metbea. Goreyê melumato ke keyepelê zazaki.net de ameyo dayene, emser bîyî 11 kitabî ke hetê weşanxaneyî ra yenî çapkerdene. Nê kitaban ra yew Kurmancî, 10 hebî zî Kirmanckî yî.
3 kitabê ke erşawîyayî metbea ra yewin bi nameyê bi nameyê Deyîran û Manîyanê Gêlî ra xebata Şahab Laçînî ya. Şahabî Egil de fekê 33 kesan ra kategorîyanê sey Deyîrê Şînî, Deyîrê Eskerî, Deyîrê Gedeyan, Deyîrê Veyveyî, Deyîrê Yarîyan, Deyîrê Zerrî û Deyîrê Bînî de tam 107 deyîrî arê dayê. Laçînî nînan ra teber, 43 hebî zî manîyê ke bi meqam yenê vatiş zî arê dayo. Manî zî eynî sey deyîran cuya sosyale ya şarê ma nîşan danê, her manî yew tewir xûy û xisletê şarê ma teswîr kena.
Kitabê dîyin hîkaye yê, bi nameyê Hîrê Nameyî kitabê Huseyîn Karkaşî yo. Huseyîn Karakaş 1996 ra nata yanî bî 24 serrî ke zindan de yo, cezaya muebedî werdo. Labelê peyê beran de zî tim nusneno. Pa enê kitabî wa, benê panc kitabê hîkayeyan yê Huseynî ke weşanîyenê. Eno kitab de bi nameyê “Nameyo Xas, Nameyo Nas, Nameyo Şaş, Bêveng, Dêvzano Sûr, Verê Lojine de, Binê Xêlîye de” hewt hîkayeyî estê. Hîkayeyanê Huseynî de teswîrê edebî yê zaf rindekî estê ke eşkenê uslûb û hawayê vatişî yê edebîyatê ma rê bibê nimûne.
62 hebî şîîrî kitab de estî
Kitabê hîrêyin bi nameyê Ez Kirdon rê Vona kitabê şiîran yê Xal Sebrî yo. Eno Xal Sebrî sey tutê keyeyêkê feqîrî 1925 de dewa Palî Necaran de ameyo dinya, Gulana 2008î de eynî dewe de şîyo rehmet. Xal Sebrî Pancês serre bîyo, şîyo medresa de wendo. 1950 de şîyo eskerî, mektebê Ali Gel de alfabeya tirkî musayo. 1967 de bîyo hevalê Şêx Meydînê birayê Şêx Saîd efendî, hîrê serrî ey het mendo û ci ra zaf feyz girewto. Şêx Meydînî nameyê Xal Sebrî kerdo Abdul Alî. Xal Sebrî 1968 ra dest pê kerdo, bi Kirdkî, Kurmancî û Tirkî şiîrî vatê. Dima enê şiîrê xwu pêro yew defter de bi alfabeya tirkî nuştê. Kitabê Xal Sebrî de 62 hebî Kirdkî, 10 Kurmancî, 1 zî Tirkî pêro pîya 73 şiîrî estê. AMED
