Bajaranê Vakurê Kurdistanî de wesayîtê zirxî timî bi qezayan kewenê rojeve û benê sebebê merganê kurdan. Na reye zî taxa Huzurevlerî ya qezaya Peyasî ya Amedî de wesayîtêko zirxî ke lez şîyêne, da wesayîtêko sîvîl. Wesayîto ke lajê tepişteyo nêweş Siddik Gulerî, Hadî Guleri zî tede bî de Sedat Cevîzlî û Welat Kahramani birîndar bîyî. Wesayîto ke 3 tenî tede birîdar bîyî, netîceyê lez girayîşî de teqle eşt û rayîr ra vejîya. Kesê birîndarî bi hetkarîya welatîyan wedarîyayî Nêweşxaneyê Cigêrayîş û Perwerdeyî yê Gazî Yaşargîlî yê Amedî. Guler û Kahraman badê kontrole nêweşxaneyî taburcî bîyî. Ame zanayene ke Cevîzlî zî seba dejê sîneyê xo nêweşxane de yeno dermankerdene. AMED
