Serekkomar Erdogan, bi heyetê qelebalixî, 22.04.2024 de îdarekarê Iraqî û ê Başûrî zîyaret kerdê. Medyaya Tirkîya û nuştoxê na medya, nê çend rojî yo ke behsê nê zîyaretî kenê. No zîyaret de, tayê peymanê yê tîcaretî îmze bibê zî esil meqsedê Erdoganî, operasyonanê leşkerî de, destekê îdarekaranê Iraqî û ê Başûrî bî. Yewna het ra wazenê ke, no hamnano ke ma ra vîyar de bidekewê Rojava. Aseno ke Dewleta Tirkîya şer de israr kena. Na zî eşkera ya ke, nê hewtay serrî yo ke, Dewleta Tirkîya, hetan eyro, nê operasyonan ra yew netîce nêgirewta. Îqtîdaranê verînan û îqtîdarê AKPyî, hetan eyro, ceng ra vêşêr, kiştiş ra vêşêr yewna rayîr nêceribnayo. Hukmatê AKPyî tede, heme îqtîdaranê verênan, şer de israr kerdo. Çunku kam îqtîdar beno wa bibo, wexto ke sîyaseten dekewto tengane, xo bi nê operasyonan îdame kerdo. Semedo ke emrê xo derg biko/bikero, şer de israr kerdo. La peynî de, nê îqtîdarî orte ra vînî/vîndî bîyê. AKP zî semedo ke, weçînayoxanê xo konsîlîde biko/bikero, polîtîkaya îmha û înkarî de israr kena. Ma zî baş zanê ke, Partîya AKPyî verbê, helişîyayîşî de şona.
Şer de û na rewşa kaotîk de, derûdorê AKP û tayê zumreyî, her ke şono zengîn/dewlemend benê. Semedo ke Tirkîya de, heq huqûq çin o, semedo ke demokrasî çin o, tayê merdimî, îmkananê îqtîrarî ra îstîfade kenê. Bêhesap bêkîtap, bi keyfî pere xerc kenê. Goreyê Raporê CHPyî, no weçînayîşo peynî de, şaredarîyê AKP yê ke dekewtê destê CHPyî, goreyê 100 mîlyar Lîra (bi pereyê verênî 100 katirlyon) yew deyn vîyardayo. Partîya DEMî tede partîyanê binan no xusus de hima yew îzahat nêkerdo. Butçeya pîroyî de zî xezna de hinê pere nêmendo. Ma zanê ke verî zî 128 mîlyar dolarî berhewa bîybê. Yewerê no xusus de yew îzahat nêkerdbi. Bankaya Merkezî (MB) 2023yî de 818,2 mîlyar zirar kerdo. Hinê her ke şono bawerîya şarî bi AKPyî nêmanena. Na zî eşkera ya, wexto ke şer bibo, qrîz zî beno. Nê rejîmî, adeta şar veyşan vîyardayo. Bêkaran, teqawitan, karkeran, karmendan, citêran û zîreetkaran adeta bi veyşaney terbîye kenê. No qrîz ra qorî îstîfade kenê, la bi pîroyî şarê Tirkîya zirar kenê.
Dewleta Tirkîya 25 Mart 2013yî de wexto ke seba çareserkserkerdişê meseleya kurdan, dest bi dîyalogî kerdbi, dolar 1,8 Lîra bîy, nika 32,3900 Lira ya. Dolar 18 qat qîymet girewto. Hukmatê AKPyî çendî şerî gir/vêşî biko endi, şerî rê zaf pere şono. AKPyî 2013yî de Wezaretê Pawitoxî rê 20,3 mîlyar Lira cîya kerdbî, seba 2024î zî 1 trîlyon 133,5 mîlyar Lîra yew butçe tahsis kerda. No pere zî 36 mîlyar Dolar keno. Aseno ke yew pereyo tewr zaf şerî rê şono. Çi heyf ke, no pere zî toneka xebatkaran ra, esnafan ra, dewijan ra vejîno. Tirkîya hetê enflasyonî ra Dinya de rêzê çarine de ca gêna. No enflasyon ra Dewlete, banka û şîrketî pere qezenc kenê, la bi pêroyî şar xizan beno. Şarê Tirkîya, no tabloyê heq nêkenê. Na xizaney û no ceng yew qeder nîyo.
Serekkomar Recep Tayyîp Erdogan semedo ke ciwanan mergî rê hedre biko, adeta propagandaya mergî keno. Dinya de yew Serekkomar, mergê ciwanan, se yew dawayêka bimbarik/qûtsî nênawneno. Na cografya, bi gonîya ciwanan awdîyaya. Gelo hinê billakerdişê gonî hinê bes nîyo? Serekkomar Erdogan tede, nê merdimî ke şer de israr kenê, gedanê xo raynêkenê şer. Ayê ke şer wazenê, ya gedanê xo rê raporê çurugî ginê, ya zî bi bedelê peran gedanê xo, leşkerî ra mûaf kenê. Pekî ewta de, guneyê gedanê xizanan çî yo? Ma ewta ra veynda/vengda Serekkomar Recep Tayyîp Erdoganî û Hukmatê ey danê; şer de israr yew gureye aqilî nîyo. Na mesela ancax bi dîyalogî hal bena. Yewna rayîr çîn o. Xora no çenday serrî yo, no şer dewam keno, tu yew çareserî nêarda. Tena ciwanê kurdan û tirkan cuya xo vînî/vîndî kerdo. Yanî no çenday serrî yo ke, na polîtîka billakerdişê gonî ra û xizaney ra vêşêr yewna çîy nêardo.
Yewna veyndayîşê/vengdayişê ma, heme partîyan kurdan, KDP û YNK tede, heme rêxistinan û hêzanê kurdan rê esto. Wa yew partî, yew rêxistin û tek yew kurd, polîtîkaya şerî rê xizmet nêko. Tersê ey, wa nê heme partî, rêxistin û heme hêzê kurdan politikaya aşîtî û demokrasi rê xizmet bikerê. Şer de ne menfeetê kurdan, ne zî yê şaranê binan esto.
Not: Roşanê Yewê Gulane pîroz bo.
