Merkezê Xeberan]
Mudurê Pêroyî yê Rêxistina Weşîye ya Dinya (WHO) Tedros Adhanom Ghebreyesuso ke Cenevre de kombîyayîşê çapemenîye kerd da eşnawitene ke virusê Korona açarîya pandemîya globale. Vilabîyayîşo hîra yê nêweşîyêka newî rê pandemî yeno vatene.
Mudirê WHOyî qesawetê xo yê semedê vilabîyayîşê Korona ard ziwan û hîşyar kerd ke do rojanê ma ya verî de nêweşîya Korona hîna zaf welatan ra bibo vila û hûmara mergî û nêweşîye zafêr bê.
Vîrusê Korona ke menga kanûne de bajarê Wuhana yê Çînî de vejîya werte û 118 welat û herêman de vila bîye. 121 hezar 560 kesî no vîrusî girewtî. Înan ra 4 hezar 370 kesî ra zafêrî dinyaya xo bedilnaye. Çîn de nêweşîye kêmîyena la cayanê bînan ê dinya de bilezî vila bena. Îtalya de hûmara kesanê ke vîrusê Korona ra kewtî 10 hezarî ra ravêrte. Heme welat gerîya karantîna. Îran de bi seyan merdeyî estî, hûmara nêweşan resaye 9 hezarî. Koreya Başûre de hûmara nêweşan 8 hezarî rê nizdî bena. Îspanya, Fransa, Almanya û Amerîka de bi hezaran nêweşî estî.
Îtalya de 827 kesî vîrus ra merdî
Badê Çînî welato ke tewr zêde vîrusî ra tesîr bî Îtalya yo. Îtalya de 12 hezar û 462 kesan de vîrus ame tespîtkerdene û înan ra 827 kesî cuya xo vindî kerdî. Îtalya de tena 24 saetan de 2 hezar û 313 kesanê bînan de vîrus ame tespîtkerdene.
Vîrus bilezûbez bilayê welatanê Ewropa beno
Goreyê eşkerayîya Wezîrê Weşî yê Fransa Olivier Veranî, serê aşma çileyî ra nata 2 hezar û 281 kesan de vîrus ameyo tespîtkerdene. Veranî eşkerayîya xo de tesdîq kerd de 24 saetanê peyênan de zî 15 kesê bînî cuya xo vindî kerdî û hûmara merdeyan resaye 48 kesan.
Îspanya 48 kesî merdî
Vîrus Îspanya de tewr zêde herêma Madrîdî de vila bî û 48 kesî cuya xo vindî kerdî. Zafaneyê merdeyan na herême ra yî. Goreyê bîlançoya fermî heta nika 2 hezar û 140 kesan de Vîrusê Korona ame tespîtkerdene.
Almanya de hûmara vakayan resaye 1 hezar û 908 kesan
Vîrus Almanya de bî sebebê mergê 3 kesan û hûmara vakayan zî resaye 1 hezar û 908 kesan.
Swêd de 642 kesan de vîrus ame vînayene û 4 kesî cuya xo vindî kerdî.
Belçîka de hûmara vakaya resaye 314 kesan û 3 kesî cuya xo vindî kerdî.
Yewnanîstan de rewşa 3 kesan giran a û 99 kesan de vîrus ame tespîtkerdene. Hukmat tersê vilabîyayîşê vîrusî ra qerarê padîyayîşê mekteb û unîversîteyan da. Yeno pawitene ke hetê ekonomî de netîceyê giran bivirazîyî ke no welat 10 serrî yo ke krîzêko giran yê ekonomî cuyeno.
