Hepsîyê sîyasî yê Zîndanê Xarpêtî ameyî derbkerdene. Ame zanayene ke hepsîyê sîyasîyan kerdî hucreyanê yewkesî û asayîşê înan çin o
Zîndananê Kurdistan û Tirkîya de her roje derheqê neheqî, zext, surgun, îşkence, derb û binpaykerdişna de xeberê neweyî yenî. Nê zîndanan ra yew zî Zîndanê Xarpêtî yo. Pîyê hepsîyo binameyê Mesut Yaşasinî, Mahsun Yaşasinî dîyar kerd ke lajê ci yo ke Hûmara 2. yê Zîndanê Xarpêtî de tewqîfkerde yo, hetê gardîyanan ra ameyo derbkerdene.
Mahsun Yaşasinî derheqê îşkecekerdişê hepsîyan û lajê xo de qisey kerd û va: “Di hewte verê cû nameyê kontrolî ser şîyî odeyanê hepsîyanê ke hucreyan de yî û înan derb kerdî. Seba ke embazê înan reaksîyon nîşan dayî, 3 hepsîyê bînan zî derb kerdî û nîşandayîşê reaksîyonî vera derheqê înan de tehqîqat ameyo akerdene. Hepsî dîyar kerdî ke asayîşê canê înan çin o û rayîrberîya zîndanî wazena îşkence sîstematîk bikero. Eşyayê hepsîyan yê ke depo de yî zî bêxebera înan teslîmê keyeyan yenî kerdene. Hepsî binê zextê madî û manewî de manenî. Hepsîyan vengê eşnawitişî raya pêroyî kerdî.” XARPÊT
