Dayîkê ke domanê înan grevê vêşanîye de yê, ard ziwan ke roja dayîkan de xelata tewr rindeke caardişê waştişê domananê înan ê
Roja Dayîkan reya verêne serra 1944 de Amerika de, bi vîrardişê cinîya bi nameyê Ana Jarvîse ameye pîrozkerdene û bado na roje bi fermîbîyayîşî heme dinya ra bîye vila. Na roje eynî wext de sembolê aşitî ya zî. Roja dayîkan seba dayîkan ê Kurdan ê ke vera şerî seba waştişê aşitî xo ver ro danê zî rojêka muhîm a. Dayîkê Kurdan bi serran o seba merdim û domanê ci yê ke ameyê vîndîkerdene û kiştene têkoşîn danê ke esteyanê ci bivînê û kerdoxanê nê serebutan bidê muhakemekerdene. Dayîkê Kurdan ê ke domanê înan hepisxaneyan de grevê vêşanîye de yê, roja dayîkan beranê hepsxaneyan de pêşwazî kenê. Dayîke ke domanê înan Zîndanê Xarpêtî de grevê vêşanîye de yê, na roje reyna vernîye berê zîndanî do pêşwazî bikerê.
Dayîka Bariş Kiliçî yo ke 4 mengî yo grevê vêşanîye de yo, Şerîfe Kiliçe ard ziwan ke, xoverdayîş resto merheleya krîtîke û a seba rewşa lajê xo qesawetê kena û va: “Seba ma ‘Roja Dayîkan’ de xelata tewr rindeka caardişê waştişê domananê ma yo.” Kiliçe tewr peynî seba wedaritişê tecrîdî vengdaye serekkomarî.
Xelata tewr rindeka aşitî ya
Dayîka Nîhat Kasûnî yo ke 1ê Adare ra nata grevê vêşanîye de yo, Bedrîye Kasûne (70) va: “Seba ma xelata tewr rindeka aşitî ya û bi serran o ma seba naye têkoşîn kenê. Ganî dewlete seba caardişê waştişanê xoverdayoxanê grevê vêşanîye cade game bierza.”
Ma ‘Roja Dayîkan’ de huzur û aşitî wazenê
Dayîka Mûrat Ergenî yo ke 4 mengî yo grevê vêşanî ye de yo, Fecîre Ergene zî va: “Ma ‘Roja Dayîkan’ de huzur û aşitî wazenê. Rayîrê nê zî waştişanê domamanê ma ra derbaz beno.”
Ganî waştişê kesanê ke grevê vêşanîye de yê bêrê
Dayîka Baran Bariş Korkmazî yo ke grevê vêşanîye de yo, Sakîne Korkmaze (59) zî ard ziwan ke, temamê Tirkîya de waştişê kesanê ke grevê vêşanîye de yê bêrê ca û va: “Ma aşitîye wazenê. Ma Tirkîyaya bihuzure wazenê. Wa xelata ma ya ‘Roja Dayîkan’ aşitîye ba. Xelata tewr rindeka ke ma rê yena dayene aşitî ya.” DÊRSIM
