Xelatê Rojnamegerîye yê Musa Anterî û Şehîdanê Çapemenîya Azade bi merasîmêkî ameyî dayene. Merasîm hetê rojnameyê Yeni Yaşamî ra Merkezê Kulturî yê Cemîl Candaşî de ameyî dayene.
Hemsereka Partîya Demokratîke ya Şaran (HDP) Pervîn Buldan, Hemvervatoxê Kongreya Demokratîke ya Şaran (HDK) Cengîz Çîçek û Esengul Demîr, Serekê EMEPî Ercument Akdenîz, Hemserekê KESKî Mehmet Bozgeyîk, Hemsereka Komeleya Rojnamegeran a Dîcle-Firatî (DFG) Dîcle Muftuoglu, Platformê Rojnamegeran ê Cinîyan ê Mezopotamya (MKGP), DÎSK Basin-Îş, Mayê Aştîye, dadîya rojnameger Mazlûm Erencîyo ke amebi qetilkerdene Remzîye Erencî û xeylêk temsîlkarê rêxistinanê komelê sivîlî tewrê merasîmî bîyî.
Nezahate û Mazlûm Akpolatî pêşkêşwanîya merasîmî kerde. Qiseykerdişan de dîya zanayene ke teqîbkerdoxê Anterî qelema ey kirişenê û raştîye nusenê.
Qiseykerdişan ra dima derheqê têkoşînê çapemenîya azade de sînevîzyonêk ame mojnayene û hunermende Feryale Oney vejîyaye sehne ser.
Akademîsyenanê aştîye Elîf Ege û Onur Hamzaogluyî Xelata Xebera Tirkî ya Taybete ya Jurîye daye muxabîranê MA Semra Turan û Tolga Guneyi. Xelatê bînî hetê Hemsereka HDPyî Pervîn Buldan ra dîyaye.
Beşê Xebera Tirkî de xebera ‘Îdîaya tecawuzê vera domana 2 serre’ ya rojnamegera Bîanetî Evrîm Kepeneke xelate girewte. Beşê fotografî de fotografê cenazaya Hakan Arslanî ya ke esteyê ci tewreyêk de dîyabî, layîqê xelate ameye dîyene ke fotograf hetê muxabîra MA Eylem Akdag ra amebi girewtene. Beşê Xebera Kurdkî de xebera ‘Manaya bilibendî û çend sirê Kurdish Mashupî’ ya rojnamegera Dengê Emerîka Omer Faruk Baranî xelete girewte. Xelata taybete ya jurîye ya xebera kurdkî zî dîyaye xebera ‘Derheqê hêrişê nîjadperestî yê Kazakîstanî de agahîyê neweyî’ yê rojnamegera Jinnewsî Medya Uren. Xelata muxabîrîya cinîyan dîyaye xebera ‘Polîsî eşt ser; dozger, doktor û polîsan nimna’ ya Mudira Karanê Nuşteyî ya Jinnewsî Safîye Alagaş. Xelata karîkaturî dîyaye karîkaturê ‘Atlasli’ yê Ozgur Evran’ û kaarîkaturê ‘cesedo ke tira vilikî zîl benê’ yê Murat Îpekî.
Xelata Rûmetî zî dîyaye dadîyanê Nobeta Edaletî. STENBOL
