Semedê yadkerdişê Musa Anterî yo ke 20ê êlula 1992yî de ameye qetilkerdene, her serre Xelatê Rojnamegerîye yê Musa Anterî û Şehîdanê Çapemenîya Azade yenê dayene. Merasîmê xeletan ê 30. ame kerdene. Merasîm de beşanê xeberanê bi tirkî, xeberanê bi kurdkî, fotograf, karîkatur û rojnamegerîya cinîyan de xelatî ameyî dayene.
Xelata xebera kurdkî dîyaye Ferîd Demîrelî. Xelata xebera tirkî dîyaye edîtorê Ajansê Mezopotamya Abdurrahman Gok ke tepişte yo. Xelata Jûrî dîyaye rojnamegeran Metîn Yoksu, Dîlan Pamuk û Îsmaîl Ari. Xelata Rojnamegerîya Cinîyan a Gurbetellî Ersoz dîyaye rojnamegera îranije Nazîla Maroofian. Xelata fotografî dîyaye Ardil Batmazî û xelata karîkaturî dîyaye Erhan Yaşar Babalikî. Xelata Rûmetî zî dîyaye MEBYA-DERî.
Avûkatanê Buroyê Huqûqî yê Asrinî ra Rezzan Saricayî ke merasîmî de qisey kerd, bale ante ser ke Rojhelatê Mîyanênî de tim sûcê merdimîye yenê kerdene û vat: ”Embazê ma yê rojnamegerî binpaykerdişê heqan, heqîqetî vejenê werte. Eynî wextî de Zîndanê Îmraliyî de tecrîd yeno caardene ke no sûcê îşkenceyî yo. 30 aşmî yo ma Abdullah Ocalanî ra xebere nêgênê. Ma bi têkoşînê vera tecrîdî biresê Abdullah Ocalanî. ”
Gama ke Saricayî qala tecrîdî kerd, yew fekî ra slogana “Bijî Serok Apo” ameye vatene.
