Bi nameyê xelatgêranê Nobelî yê ke wazenê tecrîdê serê Ocalanî bêro wedartene, Adolfo Perez Esquîvelî, sekreterê pêroyî yê CPTyî Regîs Brîllatî û endamê CPTyî yê Tirkîya ra mesuldar Michael Neurauterî rê mektûbêk şirawitî
Wayîrê Xelata Aşitîye ya Nobelî Adolfo Perez Esquîvelî Komîteya Vernîgirewtişê Muameleyo Xirab û Îşkenceyî ya Ewropa (CPT) rê mektûbêk şirawite û hîşyar kerde ke hemverê zextanê dewletan de seba bindestan nêkewo mîyanê têgêrayîşî, a game do mazeretê estbîyayîşî yê sazîyanê Ewropa memanê, raste ra wedarîyê.
Mektûbe bi nameyê Xelatêranê Nobelî yê ke menga Çele û Nîsane de seba qedîyayîşê tecrîdî di reyî veng dabi, ameye şirawitene.
Esquîvelî mektûba xo de vat ke bi nameyê Xelatgêranê Nobelî ma wazenê ke CPT babeta tecrîdî de hîna leze tê bigêro û ê pawenê ke CPT tavilî şiro serdana Îmraliyî.
Esquîvelî ard ziwan ke gama CPT dimayê nê vindertişê polîtîk û cimatkî yê menganê pyênan bikewo mîyanê têgêrayîşî do bieşko sîstemo ke heqanê Kurdan ê bingeyênan û yê hemeyê cimatî yo ke nêdîyayîşî ra yeno, tesîr ci rê bikero.
Mektûbe de pêvînayîşê roja Îneyî ya Ocalanî ame vîr vistene û ame vatene ke pêvînayîş bi saya xoverdayîşê grevê vêşanîye ya Leyla Guvene û bi hezaran tepişteyan û bi paştdayîşê xurtî yê rayapêroyîyeya seba xoverdayîşî virazîyayo.
Do sebebanê estbîyayîşê xo vînî bikerê
Mektûbe de dîya zanayene ke Ewropa, Amerîka û hemeyê dinya de xeylî sazî bi nameyê heqanê merdiman têgêrenê û ame vatene: “Nê sazîyê ke bi nameyê heqanê merdiman çar hetanê dinya de têgêrenê, eke birastî zî seba kesanê ke destê dewletan ra dej ancenê nêkewê mîyanê têgêrayîşan, a game sebebê estbîyayîşê înan nêmaneno.”
Peynîya mektûbe de ame vatene ke qedînayîşê tecrîdî do rayîrê awankerdişê aşitîya Tirkîya akero û heqanê merdiman rê hurmet ramojîyo û bibo gama destpêke. BRUKSEL
