Şaro ke serkêşîya Kongreya Komela Demokratîke (KCD), Tevgerê Cinîyanê Azadan (TJA), Partîya Demokratîke ya Şaran (HDP) û Partîya Herêmê Demokratîkî (DBP) de waşt şiro dewa Amara ya qezaya Xelfîtî ya Riha û bale bianco serê tecrîdê 23 serran ê serê Rayberê Şarê Kurdî Abdullah Ocalanî ser, ame astengkerdene. Heyetî verê banê HDPyî yê Xelfetî de derehqê babete eşkerayîye daye. Hemserekê Pêroyî yê KCDyî Bedran Ozturk, Hemsereka Pêroyî ya DBPyî Salîha Aydenîz, parlementera HDPyî Ebru Gunay, Tayîp Temel, Omer Ocalan, Ayşe Surucu, Pero Dondar, Dersim Dag, Remzîye Tosun û Mahmut Togrul û Hemserekê Pêroyî yê OHDyî Bunyamin Şeher û endamê Înîsîyatîfê Dayikê Aştîye yê Riha û bi desan kesî tewrê çalakîye bîyî.
Birarzayê Abdullah Ocalanî û parlementerê HDPyî Omer Ocalanî vat: ”Destûr nêda ke memanê ma bêrê dewe. Qanûnêko taybet est o, çew nêeşkenê dewa Birêz Ocalanî zîyaret bikero. Na bêçareyîya dewlete ya. Wa nê kerdişan caverdê. Memanê Birêz Ocalanî do tim bibê. Birêz Ocalan mezgê şarê kurdî yo. Berê me her kesî rê akerde yê, her kes eşkeno bêro. Bi zulmî û bê qanûnîye çew nêeşkeno nê asteng bikero. Ma do wayîrê na paradîgma vejîyê. Berê Birêz Ocalanî tim heskerdoxanê ci rê akerde yo. Ma nê astengkerdişî qebul nêkenê. Tersenê. Amara do tim rol û mîsyonê xo kay bikero.”
Dima ra Hemsereka Pêroyî ya DBPyî Salîha Aydenîz qisey kerd. Aydenîze astengkerdiş sey bêçareyîya îqîtdarî name kerd û vat: “Ma ewro waşt ke ramojnê Birêz Ocalanî semedê demokrasîyê tirkîya senî şexsîyeto muhîm o. Heme dinya zana ke Birêz Ocalan semedê şaran çi wazeno. Têna kurdî nê heme şarê dinya semedê azadîya Birêz Ocalanî û înşakerdişê demokrasîyî têkoşîn kenê. Her kes zano ke felsefeya Birêz Ocalanî altternatîfê nê sîstemî yo. Îqtîdarê AKP-MHPyî yo faşîst bi xorîkerdişê tecîrîd wazeno Tirkîya û Rojhelato Mîyanênî de kaosî vila bikero. Pê şer û talanî wazeno payra bimano û ameyoxê ci yo ke qedîyayo bido domnayene. Ewro Tirkîya de her hetî ra krîzî est ê. Sebebê nê rejîmê yew merdimî yo ke dişmenîya kurdan keno. Ganî helêke cuwa ver tecrîd bêro wedaritene. Heme medotê antîdemokratîkan Îmrali de dest pêkerd û vila bîyî. Heme bêhuqûqîye rîyê bêhuqûqîya Îmralîyî ra benê.Sebebê krîzanê Rojhelato Mîyanênî bêhuqûqîya Îmraliyî ya. Ganî heme şarî vera tecrîdê Îmralîyî têkoşînê hemparî bikerê. Eke tecrîd dewam bikero her ca do bibo sey zîndanê akerdeyî. Ma do heta qedîyayîşê tecrîdî têkoşîn bikerê. Ma do her hetî ra verê xo bidê Amara. Ganî cade na polîtîkaya tecrîdî bêro caverdayene.” RIHA
