Dêrsim de panelêk ame viraştene. Panel derheqê ziwanê zazakî de bî û Cigêrayoxe Netice Altun Demire va : “Xelisnayîşê ziwanî destê ma de yo.”
19. Festîvala Kultur û Xoza ya Mûnzûrî ya ke emser bi şîarê ‘Dêrsimî rê, bawerî, ziwan û kulturê xo rê wayîr vejî, biciwîye û bide ciwînayene!’ yena viraştene do heta 28ê aşme dewam bikera. Ewro roja diyîn ya festîvale ya. Roja diyîn ya festîvale de bi nameyê ‘Averşîyayîşê tarîxê ziwanê zazakî û roja ma ya ewro de cayê ci’ panelêk ameviraştene. Panel Salona Konferansî ya Şaredarîya Dêrsimî de ame viraştene û Cigêrayoxe Netîce Altun Demîr, Endamê Zaza-Derî Hidir Eren, Dr. Huseyîn Çaglayan û Endamê Perwerdeyî Dr. Îlyas Arslanî sey qiseykerdox tewrê panelî bîyî.
Dr. Îlyas Arslanî derheqê tarîxê ziwanê zazakî de sunumêk kerd. Arslanî dîyar kerd ke ziwanê zazakî xeylê dewlemend o û waşt ke seba çinnêbîyayîşê ziwanî keyeyê domanan înan reyde bi ziwanê xo qisey bikerî. Arslanî tewr peynî da zanayene ke ganî zazakî mekteban de sey ziwanê weçînitene nêro dayene.
Xeylê welatan xeylê ziwanê cîya-cîyayî estî
Dr. Huseyîn Çaglayanî qiseykerdişê xo de bale ant muhîmîya ziwan ser û va: “Ganî ziwan nêro vîrrakerdene. Ziwanê zazakî ziwanêko kokin û aîdê herêmanê koyin o. Ganî seba çinnêbîyayîşê ziwanî çi destê merdimî ra bêro, merdim bikero. Xeylê welatan xeylê ziwanê cîya-cîyayî estî. Ziwan tehluke nîyo, la Tirkîye xo rê sey tehluke vînena. Cok ra hewl dîyeno ke bêro qedexekerdene.”
Ma mecburê ke ziwanê xo bixelisnî
Cigêrayoxe Netîce Altun Demîre zî bale ante zetê ziwanê ser û va: “Bi serran o hêriş, zet û qedexeyî zêdîyayî. Dewlete çinkerdişê ziwanî de hewl dana ke kulturê şarî çin bikera. Ma mecburê ke ziwanê xo bixelisnî. Xelisnayîşê ziwanî nîme destê dewlete de yo û nîme zî destêmadeyo. Beno ke dewlete ziwan teber de qedexe bikera, la nêeşkena ke qiseykerdişê ma domananê xo reyde qedexe bikera. Cok ra xelisnayîşê ziwanî destê made yo. Ganî madomananê xo reyde zazakî qisey bikerî. Ziwan bê perwerde zî yeno xelisnayene.”
Panel bi hawayo pers û cewabdayîşan qedîya. DÊRSIM
