Cenazeyê Hevserokê Desteya Rêveber a Şengalê Merwan Bedel Xwedêda îro li çiyayê Şengalê bi merasîmeke girseyî hat veşartin.
Girseya gel piştî merasîmê dakete navçeya Sinûnê ya Şengalê û dest bi meşê kir. Girseya gel timî dirûşmên ‘Şehîd Namirin’, ‘Ey şehîd xwîna te li erdê namîne’ û ‘Bijî xweseriya Şengalê’ avêtin.
Xelkê Şengalê ji bo nerazîbûnê nîşanî bêhelwestiya hêzên Iraqê bide berê xwe da baregeha Hêzên Emniyeta Wetenî ya Iraqê. Gel bi dirûşman hevkariya hikûmeta Kazimî û hêzên Iraqê ya bi dewleta tirk re şermezar kir.
Dayik û jinên Şengalê yên dilşewitî û bihêrs nerazîbûneke tund nîşana hêzên Iraqê dan û wiha gotin: “Tu ferqeke we ji dewleta tirk û DAIŞ’ê nîne.”
Her wiha jinên ciwan diyar kirin ku ger ev hêzên Iraqê yên li Şengalê nikarin erka xwe bi cîh bînin, bila ji Şengalê derkevin.
Asayîşa Êzîdxanê jî girseya bihêrs kontrol kir ku ji bo aloziyeke mezin rû nede. ŞENGAL
