Dagirkerê ke desthilatî, dîktatorî û faşîzmê xo heta kerteyo peyîn şarê Kurdî ser de pêk anê û bi na kîndarî û neyartîyêya xo ya şarê Kurdî rê ke eşkena biko kîtabê rekoran ey gûînnessî rayêke bîne biryarêke xo yo sosret Kurdan ser de bi ca ard. Lijneya weçînayîşî yê berzî (YSK) sey ke qeşmerîya xo bi weçînoxanê şarê Kurdî bikero, bi cebrr û hîleyan dest da îradeyê înan ser. YSKî bi nê qerarê xo ke qanûnan û heq û hiqûqê weçînayoxan bi temamî, bi awayêke derbekarî û qeyûmkarî binling keno rayêke bîne neyartî û bêtehemuliya na desthilatî ya şarê Kurdî rê moşto ra. Senîn beno ke hem namzedîya kesanê ke serre dayo namzedîya şaredarî de astengêke nêvîneno û qebûl keno la dimayo yenê weçînayîşî hema newe remlanê xo erzeno. Qaşo YSK sazîyêka demokratîk e bî la aye zî xo moşt ra ke binê emrê kamî da û goreyê waştişanê kamî ra hiqûq û qanûnê (!) xo pêk ana. YSK bi nê qerarê xo moşt ra ke kewta binê emrê desthilatîya AKP/MHPî.
Na desthilatîya xespkare rayêke bîne bi dek û dolaban îradeyê şarê Kurdî xesp kena. Heto bîn ra zihinyetê AKP şexsê namzedê ey Huseyîn Beyoglû de ke weçînayîş de bi zor eşka % vîst û pancê vengan bigîro xespkarîya înan mojya ra. Ma dî senîn Beyoglûyî sey qijika ke serê laxî de bido ro vecya raşte û mezbateyê şaredarê şarê Kurdî Zeyad Ceylanî YSKî ra waşt. Xo ra ame famkerdişî ke YSK bi zanayîş serdanê namzedê şarê Kurdî ke KHK ra karê xo ra ameyê eştişî qebûl kerdo. Na desthilatî parlamenter û şaredarê ke ma bi îradeyê xo weçînabî hepis kerdî la weçînayîşo ke desthilatî da ma ver ma qebûl kerd. Û aye zî ancî dafike ro ma viraşte. Yanê bi awayêke bînî YSKî (emirqûlê AKPî) bi qebûlkerdişê namzetîya şaredaranê ma yê ameyê weçînayîşî dafike ro serreyê şarê Kurdî viraşta. Eke dafikêka bi zanebîyayîşe nêbo çirê mezbate danê namzedê AKPî ke se ra vîst û panc de mendo. Eke dafik û xespkarî nîya wa newe ra weçînayîş virazyo. Helbet ma bi faşîzm, kedwerî û çimesûrîya desthilatê dagirkeran rê xerîbî nîyê û ma nê panc serranê peynî de zî baştir bîyê haydar î la, çiyo ke merdimî kerdişanê dagirkeran ra zî zêdetir dicneno bêvengîya şarê ma ya ke bêhiqûqî û neheqîyanê na desthilatî rê bêveng manena. Xo ra bêvengîya ke ma hemverê kesanê ke semedê raşte ra wedartişê bêhiqûqî neheqî kewtê grevê veyşanî tede yê çiyoke bêro qebûlkerdişî nîyo.
Nêza ma go kenga na bêvengîya xo ya kore ra fek verra bidê û vengê xo bidê çalakgeranê xo yê grevê veyşanî ke vengê ma pêdir bibo roşnî û na tarîtî bidirrno? Her ke ma bêveng manenê dagirker û dîktatorî hartir benê! Hepisxanan û teber de roc bi roc canî helênê û bêvengîya ma ancî domêna! Hetêke bêhiqûqî û bêedaletî tecrîdî bi tecrîd domêna ma bê veng ê. Heto bîn ra bêhiqûqî û bêqanûnî xespkarî bi xespkarî domêna ma ancî bêveng ê! Nêza na bêvengîya ma çi semedî ra domêna? Zordestîya desthilatîya faşîzme ra yo yan çinêbîyayîşê pêşengtîyêke ra yo? La çi semedî ra beno wa bibo lazim o ma nê perdeyê tersî û tarîtî xo ser ra wedarê. Heta ma nê perdeyê ters û tarîtî nêdarê we go dek û dolabî, tecrîd û xespê dagirkeran xo rê ca bivînê û go roşnîya aştî û azadî nêdeyo ma ser. Roşnîya ke bideyo ma ser go bi vengdayîş û yewîtîya ma bideyo ma ser.
