Dayîka Huseyîn û Ekîn Morsumbulî Fatma Morsumbula ke Çewlîgî ra tewrê Mayanê Şemeyî bîye, 36 serrî semedê vînayîşê estayanê lajê xo Huseyîn Morsumbulo ke 1980 de bi destê dewlete ame vînîkerdene, têkoşîn kerd. Morsumbule rixmo ke semedê caardişê edaletî emrê xo da, 2016 de estayanê lejê xo rê hesret dinyaya xo bedilnaye.
Dayîka xoverdayoxe kiştê lajê xo Ekîn Morsumbulî de ameye definkerdene. Gerîlayê Têgêrayîşê Azadîye yê Kurdîstanî Ekîn Morsubul 2012 de Şemzînan de tewrê kerwanê şehîdan bibi.
Hukmatêko bi rexnekerdişê qewimîyayîşanê12ê Êlule ame îqtîdar ewro derbeya înan dano domnayene û vera dejê Dayîkanê Şemeyî kerr, kor û lalî kay keno. Înan gameke zî aver berd. Dayîka Fatma gorê ci de zî rehet nêverda. Kişta ci de hêrişê gorê lajê ci Ekîn Morsumlî kerd.
Fama Morsumbul rîyê nêweşîya xo ra seba ke rayêke nêeşkaye Meydanê Galatasarayî de cayê xo bîgêro, bi mektubêk tewrê çalakî bibî. Morsumbule mektubê de dejê ke bi serran o ancena, xoverdayîş û xeyalê xo wina ardêne ziwan:
”Embazê mi yê erjîyayeyî yê têkoşînî,
Ez bi serran semedê vînayîşê lajê xo Huseyînî ameya Galatasaray. Ez ameya copkerdene, erdî ra ameya kaşkerdene, ameya destbenkerdene la mi çirey cigêrayîş canêverda. Semedê mi wayrîvejîyayîşê Galatasarayî wayîrvejîyayîşê Huseyîn o. Ez nêweşa la qic û tornê mi ûca yê.
Çiyo ke ez 35 serrî yo ana ziwan, ewro ez do reyna qala ci bikerê.
35 serrî verê cu lajê mi Huseyîn Morsumbul hetê cûntayê Kenan Evrenî ra ame destbenkerdene. Serwan Durmuş Coşkûn Kivrako ke o wext Çewlîg de wezîfe kerdêne lajê mi destbend kerd. Kivrakî ganê xeylêk merdiman vêşna. 35 serrî yo ez pawena ke înanê ke lajê mi vînî kerd wa bêrê cezakerdene. Têna qale de nê, ez wazena wa muhakemekerdişo raşt bêro kerdene.
Şeş qicê mi estbî û ma keyeyêko halê xo de bî. Badê Darbaya 12ê Êlule 18ê êlule de leşkeran eşt keyeyê ma ser. Lajê mi Huseyîno ke wendakarê lîse bi çim û destê ey giredayî û vat ‘ma îfadeyê ci genê, 5 deqayan de peyser anê’ û o gurweto şîyê. Mi Huseyînê xo ra reyna xeberêke nêgirewte.
Huseyîn lajê min o tewr pîl bi. Gilçijeyê mi bi. Dayîkîya mi ya verêne bi… Huseyînî ra dima mi 5 qijanê xo yê bînan rê dayîkîye nêkerde. Aqil û fîkrê mi tim Huseyîn de bi. Qicanê mi yewbînî weye kerdî. Bi qala kilme badê Huseyînî keyeyê ma de ne veyve, ne roşan ne zî şayî bîyî. Keyeyê ma rê dej, hesire û pawitiş bi hekîm. Zewajê qicanê mi ma rê bi dejê ‘ma murvetê Huseyînî nêdî.’ Torne mi zî bi dejê ‘Huseyîn babî nibi’ tewrê ma bîyî.
Lajê mi Ekîn waro winayên de bi pîl. Vera çîyanê ke ma ciwîyenê sere wedart û bi girewtişê nameyê birayê xo verê xo da koyan. Xeylêk serran ra dima pêkewtişêk de dinyaya xo bedilnaye. Bedenê ci yê merdeyî rê îşkence kerd. Morg de fîşê serdinkerdişî ant û bado ke bedenê ey helisna hema Ekînê mi teslîmê mi kerd.
Mi di ewladê xo nê şerê leyminî de vînî kerdî. Cigêrê mi bi letey. Ez zana dejê ewladî senîn o. Bi wextî kêm nêbeno, xorîyêr beno. Seba ke dayîkê bînî nê dejî meancê, ez haştîye wazena.
Ez veng dana heme dayîkan; şima hay ça, qey vengê şima nêvejîyeno, qey şima nêvejîyenê kuçeyan û haştîye nêwazenê? Qey şima semedê dayîkanê ke estayanê qicanê xo rê hesretê edalet nêwazenê? Şima nêzanê dejê ewladî her dayîke seycîye vêşneno?
35 serrî yo ez pawena ke qetilkarê lajê mi bêrê cezakerdene. 35 serrî yo ke ez esteyanê Huseyînê xo pawena. Eke ez biresê Huseyînê xo ez do ê estayanê ci yê pakan mezel mekerê, paşta xo de bikirişê… Eke ez bimirî do pîya bi esteyanê lajê xo bêrê definkerdene. Xeyalê min o tewr pîl no yo…”
Xeyalê dayîke Fatma Morsumbul zî sey xeylêk dayîkanê bînan nimcet mend la qic û embazê ci têkoşînê aye yo biheybetî danê domnayene. Do rojêk qetilkarê qicanê ma yê sînayeyan, dejê dayîkanê ma yê delalan de bifatisyê. Çime: ANF
