Merkezê Xeberan
Qezaya Bazîdî ya Agirî de polîsan saetanê serê sibayî de eştî keyeyan ser û cigêrayîş pê ardî. Badê cigêrayîşî polîsa Endamê Meclîsî yê Partîya Demokratîke ya Şaran (HDP) Talha Kaya, îdarekarê HDPyî yê Bazîdî Ahmet Yaşmiş, temsîlkarê Komeleya Hetkarîya bi Keyeyanê Hukmwer û Tepişteyan (TUHAY-DER) Cemîl Koç û endamê Meclîsî yê Şaredarîya Bazîdî Rahm Gonenî zî mîyan de 13 kesan destbend kerdî.
Amed de Mîkaîl Yamano ke birayê xo yê tepişteyî rê pere şawit, ame destbendkerdene.
Colemêrg de serê sibayî sereştişê keyeyan de 8 kesî ameyî destbendkerdene. Endamê Meclîsê Ciwanan ê HDPyî Cesur Yilmaz zî vejîyayîşê Amedî de ame destbendkerdene.
Colemêrg de serê sibayî polîsan eştî xeylê keyeyan ser. Sereştişan de rayîrberê HDPyî Agît Yîgît, hemwelatîya bi nameyê Fatma Acet, Firat Akyol, Camî Bîlîk, Nîhat Kucuk, Mahsum Kuramî, Serhat Çatuk, Mustafa Dal, Omer Karavîş, Abdullah Yamanî ameyî destbendkerdene û erşawîyayî Mudirîya Asayîşî ya Stenbolî. Sebebê destbendkerdişê înan nêame zanayene. Yeno vatene ke hûmara destbendkerdişan hîna zêde ya.
Endamê Meclîsê Ciwanan ê HDPyî Cesur Yilmaz zî wexto ke Bismilî ra şîyêne Amedî ame destbendkerdene û ci berdî Mudirîya Asayîşî ya Bismilî.
