Hemverê xespkerdişê şaredarîyanê HDPyî de xoverdayîşê Amedî roja xo ya 7. de dewam keno. Şar reyna Kuçeyê Lîse de ame têhet
19ê tebaxe ra nata vera xespkerdişê şaredarîyan Amed de çalakîyê protestoyî dewam kenê. Amedijî ewro reyna Kuçeyê Lîse de ameyî têhet.
Parlamenterê HDPyî Salîha Aydenîze, Ayşe Acar Başarane, Dersîm Dage, Garo Paylan, Musa Farîsogullari, Semra Guzele, Hîşyar Ozsoy, Îmam Taşçi û Nîmettulah Erdogmûş û şarê Amedî reyna Kuçeyê Lîse de ameyî têhet. Aktîvîstê TJA, endamê DBPyî endamê Meclîsê Şaredarîye, serekê pêroyî yê Halkevlerî Nurî Gunay û hemşaredarê Bajarê Girdî yê Amedî yê Partîya Demokratîke ya Şaran (HDP) Selçûk Mizrakli yo ke wezîfeyê ci dest ra ameyo girewtene zî tewrê çalakîye bîyî. Yeno pawitene ke do saete 13.00î de HDP eşkerayîyêk bido. Nê mabênî derûdorê şaredarîye de ablûqaya polîsan dewam kena. AMED
