Cinîya kurde Jîna Emînî 13ê êlule de Tehran de seba ke ‘gijikê ci aseno’ hetê polîsanê rejîmê Îranî ra ameye derbkerdene û 16ê êlule de zî dinyaya xo bedilnaye. Îran û Rojhelatê Kurdistanî de çalakîyê protestoyî yê vera qetilkerdişê Jîna Emînî dewam kenê.
Goreyê Rêxistina Heqanê Merdiman a Îranî (IHR) heta nika 23ê ci domanî 201 kesî çalakîyan de ameyî qetilkerdene. IHR bi taybetî şaristanê Jîna Emînî Sine de qirkerdişanê dewleta Îranî ra qerqilîyeno. Dewleta Îranî Sine de tank û milîsê paramîlîterî Besicî ca kerdî.
Şewa 12-13ê teşrîna verêne de Sine de 2 kesî, Kirmaşan de 1 kes/e ameyî qetilkerdene. Merîwane de pê tifingî kesêk/ birîndar bi/bîye.
Serewedaritişê Rojhelatê Kurdistanî û Îranî zanîngehî zî tede her cayê komelî ra vila beno. Qedexeyê laçikî ra ber şar waştişê azadîye û demokrasî ano ziwan.
Roja çarşemeyî zî bi taybetî şaristananê Bokan, Sine, Seqîz, Mehabad, Kirmaşan, Bane, Merîwane, Kamîran û Îlamî yê Rojhelatê Kurdistanî de çalakîyê protestoyî zêdîyayî. Her şaristanî ra sloganê ‘jin, jiyan, azadî’ berz beno.
Paytextê Îranî Tehran de zî çalakîyî dewam kenê. Avûkatî bi sloganê ‘jin, jiyan, azadî’ vejîyayî waran û hêzanê dewlete hêrişê înan kerd. Hêzanê dewlete vera çalakîkeran guleyê raştikênî şuxilnayî.
Goreyê çimeyanê muxalîfan 31 eyaletan û 177 şaristanan de çalakîyî vila bîyê. Tay çimeyî danê zanayene ke hûmara merdimanê ke ameyê qetilkerdene hîna zaf a. Tay çimeyî pare kenê ke heta nika tewr tay 10 hezar kesî ameyê destbendkerdene û kesê ke destbend bîyê yan zî tepişîyayê raştê îşkenceyanê giranan yenê.
